Երբ ՔԿՀ-ներում մեկ տարում գրանցվում է 24 մահ, ուրեմն խնդիրը համակարգային է. Դիտորդ խմբի ղեկավար

Անցած տարվա ընթացքում ԱՆ Քրեակատարողական հիմնարկներում գրանցվել է դատապարտյալների ու կալանավորների մահվան 24 դեպք; Նման թիվն արդեն խոսում է ոչ թե անհատական դեպքերի, այլ համակարգային խնդրի մասին։ Մեդիա կենտրոնում «Առողջության պահպանման իրավունքը բանակում և քրեակատարողական համակարգում» թեմայով քննարկման ժամանակ ասաց ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի ղեկավար Սերգեյ Գաբրիելյանը։

Նրա ներկայացրած վիճակագրության համաձայն, նախորդ տարի դիտորդական խումբը ստացել է 180-ից ավելի ահազանգ, որոնց 80 տոկոսը վերաբերում են առողջական խնդիրներին՝ բուժօգնության ուշացում, քաղաքացիական հիվանդանոց տեղափոխման ուշացում, ոչ պատշաճ բուժօգնության ու դեղորայքի տրամադրում և այլն։

Ս. Գաբրիելյանն ասաց, բազմաթիվ անգամներ դիմել  են Արդարադատության, առողջապահության նախարարություններ, վարչապետի աշխատակազմ, բարձրաձայնել են խնդիրների մասին, մի մասի վերաբերյալ արձագանք եղել է, մի մասը մնացել է անպատասխան։

«ՔԿՀ-ներում մահվան դեպքերի նման բարձր ցուցանիշ գրանցվել է 2016 թվականին՝ 29 մահ։ 2024 թվականին գրանցվել է 12 մահ, բոլոր դեպքերը ներկայացվել են որպես կենսաբանական մահեր։ 2025-ին գրանցվել է մահվան 24 դեպք, որից  8-ն ինքնասպանություն է, 16-ը՝ կենսաբանական մահ, բայց այս դեպքերը բազմաթիվ հարցեր են առաջացնում, ո՞վ է  պատասխանատվություն կրում այդ մահերի համար։ Մեր այս հարցերը մնացել են անպատասխան; Մարդը եղել է ՔԿՀ-ում, այդ մարդը չկա, թե ինչպիսի զարգացումներ են եղել մահվան հետևանքով, էլի տեղեկատվություն չկա»,-ասաց Գաբրիելյանը։

ՄԻՊ աշխատակազմի Զինծառայողների և նրանց ընտանիքների անդամների իրավունքների պաշտպանության բաժնի գլխավոր մասնագետ Ալբերտ Դանիելյանն էլ մտահոգություն հայտնեց, որ մեկ տարում փակ հաստատություններում մահվան դեպքերը կրկնապատկվել են, իսկ վերջին տարիների ընթացքում գրանցվել է ինքնասպանությունների ամենամեծ թիվը։

«Ինքնասպանության նման բարձր ցուցանիշ մենք չենք ունեցել, 2011-ին և 2016-ին գրանցվել էր  ինքնասպանության 7 դեպք։ Սա վկայում է այն մասին, որ իրավասու մարմինները թերացել են ՔԿՀ-ներում գրանցված մահվան ու ինքնասպանության դեպքերի պատճառների վերհանման գործում»,-ասաց ՄԻՊ ներկայացուցիչը։

Մանրամասները՝ տեսանյութում։
Աղբյուրը` Panorama.am