Վատ լուր ունեմ իշխանությունների համար՝ սոցիոլոգիական հարցումների արդյունքների համաձայն, իրավիճակը միանգամայն այլ է. Իվետա Տոնոյան

«Եթե ամեն ինչ այդքան հիանալի է իշխանությունների ռեյտինգի, հանրային տրամադրությունների առումով, ինչի՞ համար է այս ցայտնոտը, անհասկանալի հյուրախաղերը, ամենօրյա ռեժիմով վիդեուղերձների հրապարակումները վարչապետի մակարդակով, որոնք ձոնված են այս կամ այն քաղաքական ուժին»,- դատարանի բակում լրագրողների հետ զրույցում ասաց ԱԺ նախկին պատգամավոր, «Առաջարկ Հայաստանին» նախաձեռնության հիմնադիր  Գագիկ Ծառուկյանի խոսնակ Իվետա Տոնոյանը՝ ադրադառնալով իշխանության հրապարակած հարցումների արդյունքներին, ըստ որոնց՝ ՔՊ ռեյտինգը բարձր է։ 

Նա նշեց, որ իրենք շատ լավ տիրապետում են և հանրային  տրամադրություններին, և  սոցիոլոգիական հարցումների արդյունքներին. «Վատ լուր ունեմ   իշխանությունների համար՝ այդ արդյունքների համաձայն, իրավիճակը միանգամայն այլ է»։

Նա նաև հայտարարեց, որ Գագիկ Ծառուկյանը մասնակցելու է խորհրդարանական ընտրությունների քարոզարշավին, դրան նախորդող ժամանակահատվածում ակտիվ հանդիպումների շարք է ունենալու հանրապետության գրեթե բոլոր համյանքներում, գյուղերում։

««Առաջարկ Հայաստանին» ծրագիրն այն ծրագիրն է, որը չի գրվում կաբինետներում, այլ տվյալ ոլորտի  ներկայացուցիչների կողմից են առաջ քաշվում թեզերը»,- ասաց Ի.Տոնոյանը։

Հարցին՝ ինչպե՞ս է վերաբերում Նիկոլ Փաշինյանի հրապարակած տեսանյութերին «ուժեղ տղերքի» մասին, Գագիկ Ծառուկյանի խոսնակն ասաց. «Որպես Հայաստանի շարքային քաղաքացի, իսկապես, ինձ համար առնվազն անընդունելի է  այն գործելաոճը, որ երկրի իշխանությունների ղեկավարն աշխատանքային օրվա մեծ մասն օգտագործում է  բացառապես ինչ-որ անհասկանալի, տարօրինակ չելենջների հայտարարություններ անելով։ Մեր երկրում ստեղծված իրավիճակը, բազմաթիվ խնդիրներն են արժանի ուշադրության, քան ինչ որ անլուրջ մարտահրավերների նետումն այս կամ այն քաղաքական ուժերին, գործիչներին»։

Աղբյուրը` Panorama.am