Ամայի փողոցներ, հայկական հետքը ջնջելու քաղաքականություն. Կորեացի բլոգերը շրջել է օկուպացված Արցախում

Կորեացի հայտնի ճամփորդող-բլոգեր Յոնգմին Սքայեսը վերջերս տարածել է հազվագյուտ տեսահոլովակ, որը նկարահանել է Ադրբեջանի վերահսկողության ներքո գտնվող Արցախում հայ բնակչության բռնի տեղահանումից հետո։

Նա ճանապարհորդել է Շուշիով, Ասկերանով և Ստեփանակերտով, ֆիքսել է ամայի փողոցները, վնասված տեսարժան վայրերը, ինչ նա ներկայացնում է որպես հայկական հետքերը ջնջելու և օկուպացված շրջանի ինքնությունը վերափոխելու համակարգված ջանք:

Կորեացի բլոգերն Արցախում եղել է խմբային տուրի շրջանակում, մի քանի անգամ դիմել է անհատական այցի համար, սակայն նրան թույլ չեն տվել։  Նա նշել է, որ այցելուներին արգելված էր լքել մեքենան, և այցի ընթացքում մուտքը կայքեր խստորեն վերահսկվում էր։

Բլոգերը զուգահեռներ է անցկացրել Հյուսիսային Կորեայում իր ընտանիքի պատմության և իրենց պատմական հայրենիքից տեղահանված հայերի միջև՝ ընդգծելով տեղահանության և կորստի ընդհանուր փորձը:Ստեփանակերտի մասին նա գրել է, որ այստեղ հնչում էր ադրբեջանական երաժշտություն, շատ էին ադրբեջանական դրոշները։

«Հայկական շատ տեսարժան վայրեր ավերվել կամ վերափոխվել են: Այնուամենայնիվ, խորհրդանշական «Մենք ենք մեր սարերը» հուշարձանը, որը նաև հայտնի է որպես «Տատիկ և պապիկ», մնացել է անձեռնմխելի»,-նշել է նա։

Ըստ բլոգերի՝ խումբը բազմիցս խնդրել է ավելին ցույց տալ հայկական պատմության մասին, սակայն նրանց պարբերաբար պատասխանել են, թե ուշանում են։ Ի վերջո, նրանց գրեթե ոչինչ չեն ցուցադրել և շատ քիչ տեղեկատվություն են տրամադրել հայկական ներկայության մասին։

Յոնգմին Սքայեսը նաև արձանագրել է հայկական կառավարական և կրթական հաստատությունների նախկին շենքերի ոչնչացումը։ Հաղորդվում է, որ Արցախի խորհրդարանի նախկին շենքը քանդվել է և դրա տեղը կառուցվել է «Հաղթանակի զբոսայգի», իսկ Արցախի պետական համալսարանը պատերազմից հետո վերանվանվել և վերակառուցվել է։

«Այն լիովին անճանաչելի է դարձել»,- նշում է կորեացի բլոգերն՝ անդրադառնալով քաղաքի շենքերին ու նոր հուշարձաններին։

Ողջ այցի ընթացքում տուրն ընդգծված կերպով առաջ է տարել  ադրբեջանական թեզերը՝ գրեթե տեղ չթողնելով անկախ ուսումնասիրությունների համար։ Բլոգերի խոսքով՝ ուղևորության ավարտին արդեն հիասթափություն էր առաջացել.

«Ստեփանակերտը պետք է լիներ այցելության գլխավոր կետը... բայց մենք ոտք էլ չդրեցինք քաղաք։ Այդ քարոզչությունն արդեն հոգնեցուցիչ էր դառնում»։

Բլոգերը նաև հայտնել է տեղի հյուրանոցների կողմից խաբեության զոհ դառնալու մասին։ Նա խոսել է վատ սպասարկման, թաքնված վճարների և կեղծարարությունների մասին՝ հաշվարկելով, որ այդ միջադեպերի հետևանքով  ինքն ընդհանուր առմամբ կրել է մոտ 2,400 դոլարի վնաս։
Աղբյուրը` Panorama.am