Իրանը հայտարարել է, որ Լարիջանիի մահը չի փոխի երկրի քաղաքական համակարգը

Իրանի  Ազգային անվտանգության գերագույն խորհրդի քարտուղար Ալի Լարիջանիի մահը չի ազդի երկրի քաղաքական համակարգի կայունության վրա, որը ամուր և դիմացկուն է։ Այս մասին «Ալ Ջազիրա»-ին տված հարցազրույցում հայտարարել է արտաքին գործերի նախարար Աբբաս Արաղչին ։

Դիվանագետի խոսքով, մեկ անհատի ներկայությունը կամ բացակայությունը ի վիճակի չէ ցնցել Իրանի քաղաքական կառուցվածքը։

Արաղչին հավելել է, որ համակարգում չկա ավելի կարևոր դեմք, քան Գերագույն առաջնորդը, բայց նույնիսկ Ալի Խամենեիի մահից հետո ամեն ինչ շարունակել է գործել։

Ըստ Իրանի ԱԳ նախարարի,  Միացյալ Նահանգներն ու Իսրայելը դեռ չեն գիտակցել, որ Իրանի կառավարությունը հույսը չի դնում մեկ անհատի վրա։

«Իհարկե, անհատները ազդեցիկ են, և յուրաքանչյուր մարդ խաղում է իր դերը՝ ոմանք ավելի լավ, ոմանք ավելի վատ, ոմանք ավելի քիչ, բայց կարևորն այն է, որ Իրանի քաղաքական համակարգը շատ ամուր կառուցվածք ունի»,- ասել է նա։ 

Հիշեցնենք, որ նախօրեին Իրանը հաստատել է Ազգային անվտանգության գերագույն խորհրդի քարտուղար և Իրանի կառավարության կարևոր դեմք Ալի Լարիջանիի սպանությունը: Նրա որդին՝ Մորտազան, Ազգային անվտանգության խորհրդի քարտուղարի տեղակալը և անվտանգության աշխատակիցները նույնպես զոհվել են: Թեհրանը պնդում էր, որ Լարիջանին մահացել է Միացյալ Նահանգների և Իսրայելի կողմից իրականացված հարվածի արդյունքում: Իրանի նախագահը և ԻՀՊԿ-ն խոստացել էին դաժան վրեժ լուծել պաշտոնյայի մահվան համար: 
Աղբյուրը` Panorama.am