Կփոխվե՞ն «1000» կամ «10 000» դրամանոց թղթադրամները. Մեկնաբանում է ԿԲ նախագահը

«Մենք դրա մասին խոսեցինք, մտածեցինք, ուղղակի մեծ ծախսեր են լինելու։ Մենք փորձեցինք,  եթե չեմ սխալվում 10 000 դրամանոցի վրայի «10000» գրվածը փոխեցինք, որ այն ավելի ակներև լինի, դուրս գա»,- հրավիրված մամուլի ասուլիսում ասաց ԿԲ նախագահ Մարտին Գալստյանը՝ պատասխանելով հարցին, թե արդյոք չեն ցանկանում փոխել «1000» կամ «10 000» դրամանոց թղթադրամները, քանի որ քաղաքացիները հաճախ շփոթում են դրանք։

Գալստյանի խոսքով՝ կան նաև այլ փաստարկներ, ըստ որոնց՝ դոլարի բոլոր նմուշները նույն գույնի, նույն ձևի, նույն չափի են, բայց մարդիկ ուշադիր են ու ոչ մի խնդիր չի լինում, 10 դոլարը 20 դոլարանոցի հետ ոչ մեկը չի շփոթում։

«Ես ընդունում եմ, որ կա ինչ-որ գունային գամայի նմանություն, բայց ամեն դեպքում, եթե ուշադիր լինեն, պիտի որ խնդիր չլինի»,-ասաց նա։

ԿԲ նախագահը հայտնեց, որ նոր սերնդի թղթադրամների համար  3-5 տարվա շրջանառություն են սահմանում։

«Որովհետև իրենք կոմպոզիտային են, մենակ թղթից չեն, պլաստիկի էլեմենտներ ունեն իրենց մեջ, որը թույլ է տալիս մեզ, որպեսզի իրենց մաշվածությունը նվազի։ Այսինքն մենք գնացել էինք այն ճանապարհով, որ ծախսերը նվազեցնենք։ Ինչ որ բաներ կան, որ փոխվում է բայց ամբողջությամբ սերիան փոխել այդքան ճիշտ չի լինի այս պահին, դա քննարկելու հարց է»,- ասաց Մարտին Գալստյանը։
Աղբյուրը` Panorama.am