Նիկոլական Սինանյանի հասկացողությամբ Արցախը... «լյարդի ցիռոզ» է եղել հայության համար

Փաշինյանական չինովնիկները չեն դադարում անտակտ կամ պարզապես՝ եղկելի հայտարարություններ ու համեմատություններ անելուց: Այսօր «փայլատակել» է նիկոլական Զարեհ Սինանյանը: 
Ինչպես հաղորդում է Panorama.am-ը, ԱԺ-ում լրագրողների հետ ճեպազրույցի ընթացքում Սփյուռքի գործերի գլխավոր հանձնակատար Զարեհ Սինանյանը՝ պատասխանելով հարցին, թե Արցախը հանձնելու համար ե՞րբ է պատժվելու Նիկոլ Փաշինյանն ու իշխանությունը, ասել է. «Պատիժը չպետք է հասնի Նիկոլ Փաշինյանին, մեր իշխանությանը»:

Լրագրողի դիտարկմանը, որ դա իրենց իշխանության օրոք է եղել, Սինանյանն արձագանքեց. «Հետո ի՞նչ, այ քեզ բան։ Այսինքն»:

«Մի հասարակ օրինակ. ասենք, հարբեցողը կլինիկական հիվանդություն ունի, լյարդի ցիռոզ է ստացել, խմում է, խմում է, խմում է, վերջին վայրկյանին գալիս է մի հատ բժիշկ, ասում են՝ փրկի կյանքը, ու բժիշկը չի կարողանում կյանքը փրկել»,- նշեց Սիանյանը։ 

Լրագրողների դիտարկմանը, որ Փաշինյանը կարող էր հրաժարական տալ և ասել՝ չի կարողանալու իրավիճակը փոխել, նա ասաց. «Ձեր ասածն անպատասխանատվություն է, ի՞նչ է նշանակում թող հրաժարական տար»։
--
Այսինքն, ըստ այս նիկոլականի համեմատության, իր անկրկնելի շեֆը որոշել է պատասխանատու կերպով սպանե՞լ «հիվանդին», ինչը և իրականացրել է: 
Մեր կողմից նկատենք, որ եթե որևէ մեկը Արցախը կամ Հայրենիքի որևէ հատված համարում է «լյարդի ցիռոզ» կամ քաղցկեղ, նման համեմատություն է անում, ապա կողքինները նրան պետք է խստությամբ հարցնեն, թե ինքը ո՞վ է: 
Իսկ ընդհանրապես, շատերի կարծիքով, եթե Հայաստանում կա որևէ ծանր հիվանդություն, որից անհրաժեշտ է ազատվել, ապա դա այսօրվա իշխանությունն է: