Հանուն ուժեղ և անկախ Հայաստանի. մեր նպատակը հաղթանակն է, իսկ այն չարը, որը մարմնավորում է այսօրվա իշխանությունը, պարտվելու է

Մենք տրամադրված ենք վճռական, մեր նպատակը հաղթանակն է: Վստահ եմ, որ այն չարը, որը մարմնավորում է այս իշխանությունը, պարտվելու է: Այս մասին այսօր՝ մարտի 16-ին, «Հայաստան» դաշինքի հանդիսավոր միջոցառմանը հայտարարեց ՀՀ երկրորդ նախագահ Ռոբերտ Քոչարյանը։

«Ես նրանց հետ պայքարի մեջ եմ մտել իշխանության իրենց գալու հենց առաջին օրերից, և չեմ հանգստանալու այնքան ժամանակ, մինչև նրանք չհեռացվեն: Ի դեպ, սրանով էլ եմ տարբերվում այլ վարչապետի թեկնածուներից, բայց դա բավարար չէ: Պետք է պատասխան տան նրանք, ովքեր մեղավոր են մեր հազարավոր հերոսների զոհվելու համար, ովքեր հանձնեցին Արցախը և ովքեր այսօր ստիպում են ժողովրդին մոռանալ իր հերոսական պայքարի պատմությունը:

Սիրելի հայրենակիցներ, մենք ապրում ենք մի տարօրինակ ժամանակահատվածում, երբ փորձում են մեզ համոզել, որ մեր հարուստ պատմությունը բեռ է, որը մեզ հետ է քաշում, այլ ոչ թե հենարան՝ առաջ շարժվելու համար, որ հայրենասիրությունը հնացած հասկացություն է, որը վնասակար է հայի ստամոքսի համար, որ ինքնությունը մեր էության մաս չէ, այլ սեզոնային մոդա է, որը կարելի է տարին մի քանի անգամ փոխել։ Այս վտանգավոր անհեթեթություններին մենք ասում ենք՝ ո՛չ։

«Հայաստան» դաշինքի համար մեր ինքնությունը, մեր պատմությունը և հայրենասիրությունը շարժիչ ուժ են՝ ժամանակակից և հզոր պետություն կառուցելու համար։

Այսօր աշխարհը վերածվել է քաոսի, համաշխարհային կարգը փլուզվել է, իսկ նորը դեռ չի ձևավորվել: Ամենայն հավանականությամբ ջունգլիների օրենքը որոշ ժամանակ կլինի համաշխարհային նոր կարգ: Այդ պայմաններում անվտանգությունը առաջիկա տարիներին մնում է Հայաստանի գլխավոր խնդիրներից մեկը: Հայաստանին անհրաժեշտ է մարտունակ բանակ, ուժեղ առաջնորդ և հզոր դաշնակից, որպեսզի համատեղ ուժերով չեզոքացվեն բոլոր սպառնալիքները:

Հայաստանի արտաքին քաղաքականությունը պետք է լինի կանխատեսելի, հասկանալի և մերժի մեծ տերությունների հակասությունների վրա խաղալու տարբերակը: Հիշեցնեմ, որ հենց այդ մոտեցումն ապահովվեց Հայաստանի ամենախաղ տարիները իմ նախագահության օրոք:

Այսօր հայտարարում եմ, որ կարող եմ ապահովվել մեր անվտանգության մոդելի բացարձակ հուսալի ձևաչափ:

Մենք կողմ ենք Ադրբեջանի հետ խաղաղությանը, բայց այդ խաղաղությունը պետք է հիմնված լինի ոչ թե «պապայիս արև» մոդելի վրա, այլ անվտանգության իրական երաշխիքների վրա: Դա հատկապես կարևոր է այն պայմաններում, երբ իրավունքի ուժը աշխարհում փոխարինվել է ուժի իրավունքով»,- ասաց նա։

Մանրամասն՝ տեսանյութում։
Աղբյուր՝ Yerevan.today