Հայաստանում քաղաքական հետապնդումը վերաճել է ընտրական գործընթացին ուղիղ միջամտություն. Սամվել Կարապետյանի պաշտպան

Հակակոռուպցիոն դատարանը մեկ ամսով երկարաձգել է «Ուժեղ Հայաստան» կուսակցության վարչապետի թեկնածու, բարերար Սամվել Կարապետյանի տնային կալանքը։ Դատարանի որոշման հրապարակումից հետո հենց դատարանի բակում լրագրողներին Ս. Կարապետյանի պաշտպան Արամ Վարդևանյանն ասաց, որ դատական ակտը բողոքարկելու են վերաքննիչ դատարան։

Նա նշեց, որ այս դատական ակտով ունեն իրավիճակ, երբ սահմանափակված է «Ուժեղ Հայաստան» կուսակցության նախագահի՝ Սամվել Կարապետյանի կողմից ընտրական գործընթացի ամենապատասխանատու փուլին, հատկապես նախընտրական ցուցակների ձևավորմանը, մասնակցելուց, ինչը հակաժողովրդական է։

«Սա քաղաքական գործընթացի, հավասարության, արդարության, մրցակցության պայմանների ապահովման տեսանկյունից լրջագույն խնդիր է, եթե չասեմ ընդհանրապես խաթարման ռիսկ, որովհետև պատկերացրեք՝ մենք ունենք մի իրավիճակ, որ այլ քաղաքական ուժի պայմանական ներկայացուցիչը քարոզարշավ է իրականացնում, ընդհուպ մինչև Սամվել Կարապետյանի վերաբերյալ խոսակցություն է ունենում, իր կողմից նախընտրական ցուցակի ձևավորմանն ակտիվ մասնակցում է, բայց մյուս կողմից ունենք «Ուժեղ Հայաստան» կուսակցության նախագահին, ով 9 ամիս առանց նվազագույն իրավական հիմքի գտնվում է կալանքի պայմաններում։ Ես հատուկ ընդգծեմ, որ լինի դա կալանքը, թե տնային կալանքը, դրանք երկուսն էլ կալանք են»,-ասաց փաստաբանը։

Ա.Վարդևանյանը նաև նշեց, որ  դատական նիստի ընթացքում հարցադրում է արել՝ արդյո՞ք Սամվել Կարապետյանը կարող է ուղիղ եթեր մտնել ֆեյսբուքյան սոցիալական ցանցով, թե՞ ոչ, քննիչի կողմից դրական պատասխան չի ստացել։

«Պրոբացիայի ծառայության կողմից ստացել եմ պատասխան, որտեղ ոչ մի նման բան գրված չէ։ Բայց շեշտադրեմ՝ դատական նիստի ընթացքում  դրա վերաբերյալ քննիչի, ով հանդես է գալիս որպես վարույթ իրականացնող մարմին, նման գնահատական չի ներկայացվել»,- ասաց փաստաբանը։

Ըստ նրա, այն, որ Հայաստանում քաղաքական հետապնդումների աստիճանն աննախադեպ բարձր է, ակնհայտ է բոլորի համար. «Բայց այն, որ քաղաքական հետապնդումը կարող է վերաճել, տրանսֆորմացվել այլևս այն աստիճանի, որ ընտրական գործընթացին ուղիղ միջամտություն հանդիսանա, սա իսկապես նորություն է»,- ասաց Վարդևանյանը։

Նա նշեց, որ ցանկացած ընտրական գործընթացի ամենակարևոր հատվածը ցուցակների ներկայացումն է  ԿԸՀ, որին արդեն միջամտություն արձանագրում են, ընդ որում այդ միջամտությունն ակնհայտ ոչ իրավաչափ և ապօրինի է։

Վարդևանյանը նշեց, որ Սամվել Կարապետյանը 9 ամիս է չի կարողանում իր եղբորորդու՝ Նարեկ Կարապետյանի հետ հաղորդակցվել, ով նաև գլխավորելու է «Ուժեղ Հայաստան» կուսակցության նախընտրական ցուցակը, դատարանի որոշմամբ այդ սահմանափակումը պահպանվել է։  
Աղբյուրը` Panorama.am