Հնդկաստանում նշել են գույների տոնը՝ Լաթմար Հոլին (լուսանկարներ)

Հոլի տոնը հնդկական ամենահայտնի փառատոներից է, որով հնդիկները տոնում են գարնան գալուստը՝ գունավոր ներկեր միմյանց վրա լցնելով։

Ինչպես նշում է The Daily Mail-ը, նախքան բուն Հոլիի տոնակատարությունը, հնդիկները նշում են Լաթմար Հոլին, որը քիչ է տարբերվում իսկական տոնից: Դրա անվանումը թարգմանաբար նշանակում է «ձողերի ու գույների տոն»:

Ամեն տարի Նանդգաոն գյուղի բնակիչները յուրահատուկ ձևով են նշում Լաթմար Հոլին: Իգական սեռի ներկայացուցիչները ձևացնում են, թե փայտյա երկար ձողերով ծեծում են տղամարդկանց, իսկ տղամարդիկ էլ ի պատասխան գունավոր փոշին են ցփնում կանանց վրա:

Ինչ վերաբերում է բուն Հոլիին, ապա հնագույն հնդկական տոնակատարությունը մարմնավորում է գարնան խայտաբղետությունը:

Տոնակատարության ժամանակ մարդիկ գունավոր փոշի են շաղ տալիս և ներկախառն ջուր ցողում միմյանց վրա: Ի դեպ, գունավոր փոշին պատրաստվում է դեղաբույսերից ու օգնում կանխել գարնանային վարակների տարածումը:

Միմյանց բավարար չափով ներկելուց հետո տոնակատարության մասնակիցները հավաքվում են ընտանիքներով՝ համեղ ճաշի սեղանի շուրջ:

Աղբյուրը՝ Tert.am