Խաղաղությունը ո՞րն ա, որ Ադրբեջանը սարերի վրա զենքով, զորքով նստած է, ասում ա՝ էս, էն պիտի տա՞ք. Ծառուկյան

Այսօր խաղաղությունը ո՞րն է, ուզում եմ մի հատ հասկանամ։ Այս մասին այսօր՝ մարտի 11–ին, դատարանի դիմաց լրագրողների հետ զրույցում նշեց ԲՀԿ առաջնորդ Գագիկ Ծառուկյանը։

«Խաղաղությունը նա է, որ Ադրբեջանը բոլոր սարերի վրա նստած է զենքով, զորքով, թելադրանքով, որ էս պիտի տաք, էս պիտի տաք, էս պիտի անեք, ադրբեջանական դպրոցներ պետք է լինեն, որ պետք է 300 հազար ադրբեջանցի գա Հայաստանում բնակվի, արդեն գալիս են Հայաստանում, Մարալիկում տարածքներ են նայում։ Մի հատ հայ կարա՞ գնա Ադրբեջան կամ Բաքու, ման գա։ Կամ 300 հազար ադրբեջանցի, որ պետք է գա բնակվի Հայաստանում, մեր հայրենակիցները ամեն ինչ թողած՝ տուն, տեղ, ունեցվածք, որ չեն կարողանա գնան, իսկ նրանց 300 հազարը կարան։

Սա խաղաղություն չի, սա թելադրանք է, խաղաղությունը պետք է լինի երաշխավորված խաղաղություն, որ մարդիկ հույսով, հավատով, պաշտպանված լինեն, վստահ լինեն, որ կարողանան երկրում ապրել»,–ասաց նա։

Անդրադառնալով Ադրբեջանի հետ առևտուր անելուն, Ծառուկյանն ասաց. «Առաջին հերթին պետք է խաղաղություն լինի, առանց խաղաղության չի կարող որևիցե մի բան լինի։ Այսօր ոչ մի քաղաքական ուժ պատերազմ չի ուզում, պատերազմից ոչ մեկ չի օգտվում, բայց պետք է լինի երաշխավորած խաղաղության, որ լիարժեք երաշխավորած լինի, հիմնական հարցը սա է»։

Նշենք, որ քիչ առաջ Հակակոռուպցիոն դատարանը՝ դատավոր Արամ Գրիգորյանի նախագահությամբ, հրապարակեց «Բարգավաճ Հայաստան» կուսակցության առաջնորդ Գագիկ Ծառուկյանի և Սեդրակ Առուստամյանի գործով վերդիկտը։ Դատարանն արդարացրեց Գագիկ Ծառուկյանին՝ ճանաչելով և հռչակելով նրա անմեղությունը, իսկ Առուստամյանի վերաբերյալ կայացրեց մեղադրական վերդիկտ։

Հիշեցնենք, որ նշված քրեական վարույթը վերաբերում է Ազգային ժողովի՝ 2017 թվականի ապրիլի 2-ի ընտրություններին մասնակցած կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին ենթադրաբար կաշառք տալուն: Նրանց մեղադրանք է ներկայացվել ՀՀ քրեական օրենսգրքի 219-րդ հոդվածի 1-ին մասով, այն է՝ ընտրակաշառք տալը։

Գագիկ Ծառուկյանը և Սեդրակ Առուստամյանն առաջադրված մեղադրանքը չեն ընդունել։
Աղբյուր՝ News.am