ԱՄՆ Սենատում հայտարարել են, որ ԱՄՆ–ն գնում է Իրանի դեմ ցամաքային գործողության ուղղությամբ

ԱՄՆ-ն ընթանում է դեպի Իրանում ցամաքային ռազմական գործողության իրականացում։ Նման հայտարարությամբ հանդես է եկել դեմոկրատ սենատոր Ռիչարդ Բլյումենթալը՝ Սենատում «Էպիկական ցասում» գործողության վերաբերյալ փակ ճեպազրույցից հետո։ Ելույթի հեռարձակումը հասանելի է Forbes Breaking News յութուբյան ալիքում։ «Սենատում իմ 15-ամյա գործունեության ընթացքում դեռ երբեք որևէ քննարկումից այսքան դժգոհ ու վրդովված դուրս չէի եկել։

Ամենից շատ ինձ անհանգստացնում է ամերիկացիների կյանքին սպառնացող վտանգը։ Տպավորություն է, թե մենք գնում ենք մի ճանապարհով, որը կհանգեցնի Իրանի տարածքում ամերիկյան զորքերի տեղակայմանը», — նշել է սենատորը։ Բլյումենթալը հավելել է նաև, որ զեկույցից հետո իր մոտ «ավելի շատ հարցեր են առաջացել, քան պատասխաններ», հատկապես՝ Իրանի հետ հավանական պատերազմի ֆինանսական ծախսերի վերաբերյալ։

ԱՄՆ նախագահ Դոնալդ Թրամփն ավելի վաղ չէր բացառել Իրանում ցամաքային գործողություն իրականացնելու հնարավորությունը։ Ամերիկյան առաջնորդն ասել էր, որ եթե Իսլամական հանրապետության իշխանությունները պահպանեն երկրի նկատմամբ վերահսկողությունը, ապա Միացյալ Նահանգները պատրաստ կլինեն «ցամաքային ուժեր ուղարկել»։ Բացի այդ, Axios-ը, հղում անելով չորս աղբյուրների, գրել էր, որ Թրամփը դիտարկում է Իրան ամերիկյան հատուկ նշանակության ջոկատայիններ ուղարկելու հնարավորությունը՝ իրանական հարստացված ուրանի պաշարների «անվտանգությունն ապահովելու» համար։

ԱՄՆ նախագահը հրապարակավ ընդունել է, որ կարող է հատուկ նշանակության ուժեր ուղարկել՝ հարստացված ուրանի պաշարները զավթելու համար։