Տուն առնելը հեշտանում է, երբ իշխանության ես գալիս․ «Քաղաքացիական պայմանագրի» առաջին դեմքերը «հեղափոխությունից» հետո անշարժ գույքեր են ձեռք բերել

2018 թվականի «թավշյա հեղափոխությունից» հետո իշխանության եկած «Քաղաքացիական պայմանագիր» կուսակցության մի շարք բարձրաստիճան ներկայացուցիչների գույքային վիճակը զգալի փոփոխություններ է կրել։ Նրանց տարեկան հայտարարագրերի ուսումնասիրությունը ցույց է տալիս, որ պետական բարձր պաշտոններ ստանձնելուց հետո նրանցից շատերը ձեռք են բերել նոր բնակարաններ, հողատարածքներ և այլ անշարժ գույք՝ ինչպես մայրաքաղաքում, այնպես էլ հանրապետության տարբեր մարզերում։
Ստորև ներկայացնում ենք «Քաղաքացիական պայմանագրի» առաջին դեմքերի կողմից 2018-2024 թվականներին կատարված խոշոր գործարքների ցանկը՝ հիմնված պաշտոնական հայտարարագրերի վրա:

Արարատ Միրզոյան
Արտգործ նախարար Արարատ Միրզոյանը, ով մինչ պաշտոնը ստանձնելը 2004 թվականից ի վեր ուներ բնակարան Շենգավիթում, 2018 թվականի հոկտեմբերի 2-ին՝ հեղափոխությունից 5 ամիս անց բնակարան է ձեռք բերել Երևանում։
Դրանից հետո՝ 2022 թվականի դեկտեմբերի 23-ին, նա ձեռք է բերել սեփական տուն Կոտայքի մարզի Նաիրի համայնքում, որի ձեռքբերման արժեքը կազմել է շուրջ 112,000,000 ՀՀ դրամ:

Գևորգ Պապոյան
Էկոնոմիկայի նախարար Գևորգ Պապոյանը ևս հետևել է նույն տրամաբանությանը: 2018 թվականի հոկտեմբերի 17-ին Երևանում բնակարան ձեռք բերելուց հետո, 2022 թվականի մարտի 17-ին նա կրկին ձեռք է բերել անշարժ գույք մայրաքաղաքում: Գործարքի արժեքը կազմել է 21,017,400 ՀՀ դրամ:

Արայիկ Հարությունյան
Վարչապետի աշխատակազմի ղեկավար Արայիկ Հարությունյանը 2022-2024 թվականներին աչքի է ընկել առանձնահատուկ ակտիվությամբ։ 2022 թվականի օգոստոսին նա հողամաս է ձեռք բերել Կոտայքի մարզի Նաիրի համայնքում 8,320,000 ՀՀ դրամով, իսկ 2024 թվականի մարտին՝ ևս մեկ հողամաս Իջևանում 1,215,000 ՀՀ դրամով:
Նույն 2024 թվականի դեկտեմբերին նա իր ամենախոշոր գնումն է կատարել՝ ձեռք բերելով անշարժ գույք Երևանում՝ 36,323,902 ՀՀ դրամով:

Հայկ Կոնջորյան
ԱԺ պատգամավոր Հայկ Կոնջորյանի գույքային վիճակը նույնպես զգալիորեն ամրապնդվել է վերջին տարիներին: 2018 թվականի նոյեմբերի 21-ին Երևանում Նոր Նորք թաղամասում բնակարան ձեռք բերելուց հետո, 2024 թվականի հուլիսի 26-ին նա ձեռք է բերել ևս մեկ խոշոր անշարժ գույք Աբովյան քաղաքում, որի համար վճարվել է 54,000,000 ՀՀ դրամ:

Սուրեն Պապիկյան
Պաշտպանության նախարար Սուրեն Պապիկյանը, ով մինչ պաշտոնը ստանձնելը 2003 թվականից ի վեր ունի մի քանի հողամասեր Լոռու մարզում, 2019 թվականի նոյեմբերի 2-ին ձեռք է բերել բնակարան Երևանում՝ Արաբկիր վարչական շրջանում:
Բացի այդ, նրա 2024 թվականի հայտարարագրի համաձայն, նա փաստացի տիրապետում է Կենտրոն վարչական շրջանում գտնվող առանձնատան:

Ամփոփելով կարելի է արձանագրել մի հետաքրքիր օրինաչափություն. «Քաղաքացիական պայմանագրի» առաջին դեմքերը, որոնք տարիներ շարունակ պայքարում էին «հարուստների իշխանության» դեմ և խոստանում էին աղքատության վերացում, իշխանության գալուց հետո բավականին արագ կարողացան ձեռք բերել խոշոր անշարժ գույքեր: Ինչպե՞ս ստացվեց, որ հենց իշխանության ղեկին հայտնվելուց հետո նրանց բարեկեցությունն այսքան արագ աճեց: Նյութը պատրաստվել է հիմնվելով Կոռուպցիայի կանխարգելման հանձնաժողովի (cpcarmenia.am) պաշտոնական կայքում հրապարակված պաշտոնատար անձանց գույքի և եկամուտների հայտարարագրերի վրա:
Մանրամասն ՝ տեսանյութում:
Աղբյուր՝ yerkir.am