Ըստ ամերիկյան The Wall Street Journal պարբերականի՝ Թրամփի շրջապատը խուճապի մեջ է և հորդորում է Թրամփին՝ դադարեցնել պատերազմը

ԱՄՆ նախագահ Դոնալդ Թրամփի խորհրդականները  խորհուրդ են տալիս նրան ելք փնտրել Իրանի դեմ պատերազմից  դուրս գալու համար՝ երկրում հանրային աջակցությունը պահպանելու հույսով, հաղորդում է The Wall Street Journal (WSJ)-ը՝ հղում անելով իր աղբյուրներին։

Ըստ իրենց աղբյուրների՝ Թրամփը  զարմացած է, որ Թեհրանը հրաժարվում է հանձնվել։ Նախագահի շրջապատը կարծում է, որ անհրաժեշտ է մշակել ռազմական հակամարտությունից դուրս գալու ծրագիր և այն ներկայացնել որպես ԱՄՆ զինված ուժերի կողմից իրենց հայտարարված նպատակներին արդեն հասած լինելու հետևանք։

Ամերիկյան պարբերականը  նշում է, որ Իրանի դեմ գործողության հանրային աջակցության արդեն իսկ ցածր մակարդակը կարող է ավելի նվազել, եթե այն վերածվի երկարատև հակամարտության։ «Երբ գազի և նավթի գները բարձրանում են, մնացած ամեն ինչ բարձրանում է։ Քանի որ ապրանքների և ծառայությունների մատչելիությունն արդեն իսկ խնդիր էր, այս նոր գների բարձրացումը  կհանգեցնի լուրջ խնդիրների», - թերթին ասել է Թրամփի   աշխատակազմի տնտեսական խորհրդական Սթիվեն Մուրը։

Ըստ ամերիկյան աղբյուրների՝ հենց այդ պատճառով, երեկ   երկուշաբթի  Դոնալդ Թրամփը CBS News-ին տված հարցազրույցում հայտարարեց, որ Իրանի դեմ ռազմական արշավը մոտենում է ավարտին՝ նշելով, որ Միացյալ Նահանգները մի քանի շաբաթ առաջ է իր նախատեսված գործողությունների ժամանակացույցից։

Ըստ Սպիտակ տան աղբյուրների՝ Թրամփի խորհրդականները պնդում են, որ Թրամփը պիտի օր առաջ դադարեցնի այս պատերազմը, որպեսզի նրա վարկանիշի փլուզում երկրում չարձանագրվի:

Հենց այդ պատճառով Թրամփը իր բանագնացներին ուղարկեց Իսրայել, որպեսզի վերջիններս համոզեն Նեթանյահուին հայտարարել պատերազմի ավարտի մասին:

Զուգահեռաբար, Թրամփը զանգահարեց Ռուսաստանի նախագահին, որպեսզի վերջինիս համոզի ազդել Թեհրանի վրա՝ պատերազմի դադարեցման որոշում կայացնելու համար:

Մինչդեռ Իրանի կողմից այլ մեսիջներ են հնչում, որից պարզվում է, որ Թեհրանը մտադիր չէ դադարեցնելու պատերազմը, սպասելով, թե երբ պիտի վերջանա ԱՄՆ-ի և Իսրայելի ռազմամթերքը, զուգահեռաբար հայտարարելով, որ Հորմուզի նեղուցով թույլ կտա անցնել բացառապես իր համար «բարեկամ երկրների» նավերին:

Իրանի այս մեսիջը էլ ավելի է նյարդայնացրել Թրամփին, սակայն վերջինիս հնարավորությունները՝ ազդել Թհրանի վրա, օր օրի սահմանափակվում են:

Ըստ փորձագետների՝ Իրանի հարցը հնարավոր կլիներ լուծել, եթե այդ երկրի ներսում լիներ անջատողական շարժումների մեծ պոտենցիալ:

Սակայն այս օրերին պարզվել է, որ այդ հույսերը խիստ ուռճացված են եղել:

92 միլինանոց բնակչությամբ երկրում քրդական անջատողական շարժումը ոչ մի հեռանկար չի ունեցել, ի սկզբանե, բելուջների վրա դրված հույսերը նույնպես չեն արդարացվել, իսկ 12 մլնանոց ադրբեջանցիները Իրանում իրենց երբեք չեն զգացել ազգային փոքրամասնություն, քանի որ այդ երկրի քաղաքական և տնտեսական վերնախավի մոտ կեսը հենց իրենց համայնբքի ներկայացուցիչներից է բաղկացած:

Բավարար է նշել, որ ներկայիս Իրանի նորընտիր առաջնորդը նույնպես ադրբեջանցի է, ինչպես նաև ադրբեջանցի է այդ երկրի նախագահ՝Փեզեշկիանը:

Ստացվել է այնպես, որ տարիներ շարունակ Իրաքի Քրդստանի ղեկավարը՝ Բարզանին և ներկայիս Ադրբեջանի ղեկավարը՝ Ալիևը, տարիներ շարունակ խաբել են հրեաներին, ներկայացնելով, որ իրենց հայրենակիցները Իրանում սպասում են, թե երբ են ազատագրվելու դրսի աջակցությամբ, իսկ Քրդաստանն ու Ադրբեջանն էլ դրսից են օգնելու՝ այդ հարցը լուծելու համար:

Ստացվել է, որ Ալիևն ու Բարզանին խաբել են հրեաներին, իսկ վերջիններս էլ, իրենց հերթին, խաբել են Թրամփին:

Արդյունքում, տարիներ շարունակ Իրաքի Քրդստանն ու Ադրբեջանը ստացել են Իսրայելից ռազմական օգնություններ, սակայն այս ճակատագրական պահին ձեռնպահ մնացին Իրանի դեմ գործողությունից:

Բայց դա կներկայացնենք առանձին վերլուծությամբ, իսկ այսօր արձանագրենք, որ վերը նշված փաստերի արդյունքում, Իսրայելին և ԱՄՆ-ին ոչ միայն չհաջողվեց Իրանի հանդեպ լուրջ հաղթանակ տանել, այլև աշխարհը կանգնեցվեց նոր և վտանգավոր ճգնաժամի առջև:

Թրամփն, իր հերթին, կարող է կանգնել լուրջ խնդիրների առաջ, հատկապես, եթե հաշվի առնենք, որ այս տարվա աշնանը այդ երկրի Կոնգրեսի մեկ երրորդի ընտրություն է սպասվում:

Սա է իրականությունը:

Արտակ Հակոբյան
Zham.am