Մենք արդեն մահանում ենք, հասկանում եք, մարում ենք մենք արդեն. Անհետ կորած զինծառայողների մայրերի ու քույրերի ակցիան Կառավարության դիմաց

«Այսօր խաղաղ ակցիա եք անում, բայց ոչ լռության, որովհետև պիտի մենք խոսենք, որովհետև էլ չի լինում լռել այս ցավի մասին։ Անհնար է դիմանալ այս տանջանքին, տառապանքին, մենք սպասում ենք մեր զավակներին»,-մարտի 8-ին կառավարության դիմաց  անհետ կորած զինծառայողների մայրերի կազմակերպած խաղաղ ակցիայի ժամանակ ասաց 44-օրյա պատերազմին անհետ կորած Վարուժան Իսրայելյանի մայրը` Ասյա Դանիելյանը։

Նա նշեց, որ ակցիային մասնակցում են բոլոր արցախյան պատերազմների ժամանակ անհետ կորած զինծառայողների ծնողները։

«Սպասումը, անորոշությունը օրեցօր ավելի է սաստկանում, սուտ է, որ ասում են՝ ժամանակը բուժում է, ժամանակը չի կարող բուժել, որովհետև կարոտը էլ ավելի է սեղմում, որովհետև չենք կարում, մենք արդեն մահանում ենք, հասկանում եք, մարում ենք մենք արդեն, ունենք շատ ծնողներ, որ ցավոք այսօր մեր հետ չեն, որովհետև չդիմացան էս ցավի կսկիծին։ Միգուցե վաղը ես էլ չարթնանամ, միգուցե կառավարությունը ուզում է, որ մենք մահանանք, բայց ինձնից հետո իմ աղջիկն է պահանջելու...

Մեր տղաները հերոսներ են, իսկ հերոսների ծնողներին այպես չեն վերաբերում»։

Ասյա Դանիելյանն ասաց, որ պահանջում են և՛ արդարադատության նախարարությունից, և՛ մարդու իրավունքների պաշտպանի գրասենյակից, և՛ դատախազությունից, որ գտնեն իրենց որդիներին, քանի որ իրենք են տարել և պատասխանատու են անհետ կորելու համար:
Աղբյուրը` Panorama.am