«Հրապարակ». Այդ պնդումներն ընդամենը խիզախ հայտարարություններ են

«Հրապարակը» գրում է. «Վերջին շրջանում Նիկոլ Փաշինյանն ու թիմը ընդդիմության դեմ նաեւ հոգեբանական տեռորի գործիքն են բանեցնում` տարբեր ամբիոններից հայտարարում են, որ «Հայաստան» դաշինքը չի լինելու հաջորդ խորհրդարանում։ Փաշինյանը նախօրեի հարցուպատասխանի ժամանակ ԱԺ ամբիոնից հայտարարեց դա եւ նկարագրեց հունիսի 7-ի ընտրություններից հետո ձեւավորվելիք խորհրդարանը, թե ԱԺ-ում կլինի 2 ընդդիմադիր ուժ, բայց ո՛չ Քոչարյանի առաջնորդած ուժը։ «Հըմի ձեր կեսի չափով տենց մի հատ ուրիշ խմբակցություն ա ըլնելու, մեկ էլ ընդեղ բանով, երրորդ ուժն էլ, ինչպես ասում են՝ բանով, դավեսկայով մի հատ էլ երրորդ ուժ ա ըլնելու, որը դուք չեք ըլնելու»,- հայտարարեց նա: Երեկ՝ կառավարության նիստից հետո կայացած ճեպազրույցում էլ Փաշինյանը կրկնեց նախորդ օրվա պնդումը, ասաց, որ այդ պնդումն արել է՝ հիմնվելով իրենց իրականացրած հարցումների վրա: Ե՞րբ են արվել այդ հարցումները, ո՞ւմ կողմից․ չմանրամասնեց՝ շեշտելով, թե դրանք հրապարակման ենթակա չեն, քանի որ արվել են իրենց աշխատանքային նպատակների համար․ «Ես տիրապետում եմ հարցումների եւ ինֆորմացիայի եւ առանց դրա չէի կարող նման բան հայտարարել»։ Երկրորդ նախագահի գրասենյակը, մինչդեռ, օրերս հակադարձել էր Ալեն Սիմոնյանի նույն պնդումներին, թե երկրորդ նախագահի թիմը հաջորդ խորհրդարան անցնելու խնդիր ունի, հայտնել էին, որ իրենց վերջերս իրականացրած հարցումները հակառակ պատկերն են ցույց տալիս:

Ո՞ւմ սոցհարցումներն են իրական՝ Նիկոլ Փաշինյանի՞, թե՞ Ռոբերտ Քոչարյանի թիմի։ Սոցիոլոգ Արթուր Պարոնյանը մեզ ասաց, որ ինքն անձամբ այս պահի դրությամբ հարցման արդյունքներ չունի, բայց չի համաձայնի Փաշինյանի եւ նրա թիմակիցների պնդումների հետ։ «Անգամ իրենց տպած թվերը (նկատի ունի «Հայաստանի ընտրական համակարգի ուսումնասիրության կենտրոնի» (ArmES) օրերս հրապարակած հարցման արդյունքները` Լ․ Շ․) ցույց են տալիս, որ իրենց ասածն առնվազն շատ խիզախ հայտարարություններ են, քանի որ Քոչարյանի քաղաքական միավորը դուրս մղվելու միտում չունի»,- ասաց սոցիոլոգը՝ բացատրելով, որ հարցման մեթոդաբանության մեջ կան էական շեղումներ․ «ArmES-ի տվյալներով, Քոչարյանն ունի 6.4 տոկոս, այսինքն՝ մոտ 7 տոկոս, արդյո՞ք սա նշանակում է, որ չի անցնելու, դա կարող է լինել տրամադրություն, կարող է լինել, որ ինչ-որ մարդ այդ հարցմանը ճիշտ չի պատասխանել եւ այլն, հետեւաբար, առանց ճշգրիտ թիվ ունենալու նման հայտարարություն անելը կնշանակի, որ իրենք ընդամենը սեփական պրոպագանդան են տանում՝ իրենց հայտնի նպատակով: Գուցե ավելի շատ են վախենում Քոչարյանից, կամ այլ միտում կա, ես չեմ կարող ասել, թե ինչ պատճառով, ինչ նպատակով»։

Սոցիոլոգն ուշադրություն հրավիրեց այն փաստի վրա, որ, ըստ այդ կազմակերպության հարցումների, արդյունքները պատկերվել են 65 տոկոս մասնակցության պարագայում․ «65 տոկոսը մոտավորապես «Գյումրի» է լինում, եւ իրենք «ոչ ոքի» անելու հնարավորություն չունեն, Գյումրիում մենք դա տեսել ենք, մինչդեռ իրենց տպած պատկերում «ոչ ոքի» է եկել՝ 40/40։ Հարցման մեջ ես կարող եմ 10 անուն դնել ընդդիմությունից, 1 անուն՝ իշխանությունից, ինչն իրենք արել են ու դրա հաշվին ստացել են առավելություն։ Այսինքն, նման հնարքներ են կիրառել հարցման մեջ, դրա համար եմ ասում` համաձայն չեմ մեթոդաբանության հետ»։

Սոցիոլոգի խոսքով՝ եթե իշխանական քարոզչամեքենան առավոտից երեկո Քոչարյանին բացասական լույսի ներքո է ներկայացնում, որ մեր «ամենամեծ թշնամին Քոչարյանն է», ապա սպասելի է, որ հեռախոսային հարցումների արդյունքն էլ պետք է ցածր գրանցվեր․ «Ուստի, հաշվի առնելով նաեւ սոցիոլոգիական շեղումը, որը 2 տոկոս է եւ որը, վստահաբար, ազդելու է Քոչարյանի վրա, իրենց պնդումները, թե «Հայաստան» դաշինքը չի անցնելու հաջորդ խորհրդարան, կրկնում եմ՝ շատ խիզախ են, չհասկանալով, թե ինչ ֆորմատով է Քոչարյանը գնում, ինչպես եւ այլն»: