Իլհամ Ալիևն Անվտանգության խորհրդի նիստում Իրանին սպառնացել է «երկաթե բռունցքով»

Ադրբեջանի նախագահ Իլհամ Ալիևը Նախիջևանի վրա անօդաչու թռչող սարքերի հարձակման կապակցությամբ Անվտանգության խորհրդի նիստ է գումարել, որի ընթացքում այդ հարձակումն անվանել է ադրբեջանական պետության դեմ ուղղված «ահաբեկչական ակտ»։

«Ադրբեջանական պետությունը վճռականորեն դատապարտում է այս նողկալի ահաբեկչական գործողությունը. դրա հեղինակները պետք է անհապաղ պատասխանատվության ենթարկվեն։ Իրանցի պաշտոնյաները պետք է բացատրություններ տան ադրբեջանական կողմին, ներողություն խնդրեն, իսկ այս ահաբեկչության մեղավորները պետք է քրեական պատասխանատվության ենթարկվեն», - հայտարարել է Իլհամ Ալիևը՝ հավելելով, որ զինված ուժերին հանձնարարական է տրվել պատրաստել և իրականացնել պատասխան միջոցառումներ։

Ադրբեջանի նախագահի խոսքով՝ իրանական կողմին բազմիցս հայտարարվել է, որ Ադրբեջանի տարածքը չի օգտագործվի որևէ հարևան պետության դեմ։ Սակայն, նրա գնահատմամբ, «Իրանում քաջ գիտակցում են, որ այսօր անկախ ադրբեջանական պետությունը հույս է հանդիսանում Իրանում բնակվող բազմաթիվ ադրբեջանցիների համար»։

«Այսինքն՝ իրանական հասարակության առջև մեզ սևացնելու, զրպարտելու և վարկաբեկելու փորձերը հենց այդ նպատակն էին հետապնդում։ Քանզի դրա համար որևէ հիմք չկար։ Ադրբեջանը ո՛չ այն ժամանակ, ո՛չ էլ հիմա չի մասնակցում և չի մասնակցելու Իրանի դեմ գործողություններին... Մենք պաշտպանում ենք և պաշտպանել ենք մեր տարածքային ամբողջականությունը։ Ինչպես որ վերջ դրեցինք հայկական օկուպացիային, այնպես էլ պատրաստ ենք մեր ուժը ցույց տալ ցանկացած չար ուժի դեմ, և թող Իրանում դա չմոռանան։

Մեր դեմ այս ահաբեկչությունն իրականացրած այդ անազնիվ մարդիկ կփոշմանեն դրա համար։ Թող չփորձեն մեր ուժը։ Մենք «Երկաթե բռունցքով» ջարդել ենք այն մարդկանց գլուխները, ովքեր ցանկացել են փորձել մեր ուժը», - սպառնացել է Իլհամ Ալիևը։
Աղբյուր՝ News.am 
--
Ի դեպ, մեր կողմից ուշադրություն հրավիրենք այն հանգամանքի վրա, որ Նիկոլ Փաշինյանի՝ «Զայեդ» մրցանակային եղբայր Ալիևը Իրանին սպառնալիս խոսել է Արցախում իր կողմից իրականացված ցեղասպանական գործողության վրա: Թե բա «հայկական օկուպացիա»: Հայերս հազարավոր տարիներ մեր հողի վրա ապրել ենք, այդ թվում՝ Արցախում, ու պարզվում է... մենք օկուպանտներ ենք: Ու ՔՊ-ն և Փաշինյանը սրա հետ «խաղաղություն» են նախաստորագրում (մնացածը չկրկնենք):