Չինաստանի «Սինխուա» լրատվական գործակալության պլակատային արձագանքները ամերիկյան ագրեսիային

Չինաստանի պետական «Սինխուա» (բառացի՝ «Նոր Չինաստան») լրատվական գործակալությունը, բնականաբար, ակտիվորեն անդրադառնում է Իրանի դեմ ամերիկա-իսրայելական ագրեսիային ու տարածաշրջանում կատարվող իրադարձություններին:
Ուշագրավ է, որ չինական պետական գործակալությունը դիմել է քարոզչական այնպիսի, թվում է, թե մոռացված գործիքի, ինչպիսին են ծաղրանկարներն ու պլակատները: Նման պլակատներ, ծաղրանկարներ ակտիվորեն գործածվում էին, օրինակ, 20-րդ դարի առաջին կեսում, ինչպես ֆաշիստական Գերմանիայում, այնպես էլ՝ ԽՍՀՄ-ում, մի փոքր ավելի պակաս չափով՝ Երկրորդ աշխարհամարտի մեջ մտած այլ երկրներում: 
Նման պլակատային նկարների հիմնական նպատակն էր հնարավորինս բարձրացնել յուրայինների մարտական ոգին և մոտիվացիան, զուգահեռաբար՝ թշնամուն հնարավորինս հրեշավոր կերպարով ներկայացնելը: 
Թվում է, թե անցյալում մնացած քարոզչական այդ գործիքը չինական գործակալությունը որոշ չափով թարմացրել է, մասնավորապես, պլակատային ծաղրանկարների մի մասը պատրաստված է «արհեստական բանականության» միջոցով: Այդ նկարները ակտիվորեն տարածվում են գործակալության սոցցանցային էջերով, օրինակ, «Ֆեյսբուքում»:   
Հատկանշական է, որ պլակատային նկարների մի մասը նվիրված է ԱՄՆ-ի և Իսրայելի կողմից Իրանի Մինաբ քաղաքում տարրական դպրոցի ռմբակոծությանն ու դրա հետևանքով 150-ից ավելի աղջիկ երեխաների սպանության սահմռկեցուիչ եղելությանը: 
Ինքնին հասկանալի է, որ չինական գործակալության տարածած պլակատների բովանդակությունը ԱՄՆ-ի ներկայիս ղեկավարության և Թրամփի վարչակազմի դրսևորած ագրեսիայի դեմ է ուղղված: 
Ա.Հ. 
Zham.am