Իսպանիան դատապարտել է Իրանի դեմ հարձակումը. մինչդեռ Սաուդյան Արաբիան դատապարտել է Իրանի հակահարվածները

Ինչպես հայտնի է, այսօր, փետրվարի 28-ին, Իսրայելի ռազմաօդային ուժերը հարվածներ են հասցրել Իրանում գտնվող տարբեր թիրախների, ըստ որոշ տեղեկությունների՝ ԱՄՆ աջակցությամբ։ Հարվածները տեղի են ունեցել իրանա-ամերիկյան բանակցությունների ընթացքում։

Իսրայելական կողմը հրթիռային հարվածներ է հասցրել Իրանի մի շարք քաղաքներին.  Թեհրանին, Սպահանին,  Ղոմին:

Հարձակման սկսվելուց հետո ԱՄՆ նախագահ Դոնալդ Թրամփը տեսանյութ հրապարակեց, որում հայտարարեց, որ թույլ չի տա Իրանին միջուկային զենք ունենալ:

Այսօր, շաբաթ օրը, առավոտյան մի շարք պայթյուններ ցնցեցին Իրանի մայրաքաղաքը։ Իրանի «Ֆարս» լրատվական գործակալությունը հաղորդեց երեք պայթյունի մասին։ Նախնական հաղորդագրությունների համաձայն՝ մի քանի հրթիռներ հարվածել են Թեհրանի կենտրոնական Համալսարանական փողոցին և Ջոմհուրի (Հանրապետություն) թաղամասին։ Մոտ կես ժամ անց ստացվեցին Թեհրանի հյուսիսային և արևելյան շրջաններում պայթյունների մասին լրացուցիչ հաղորդագրություններ։ Ըստ «Ասոշիեյթեդ Փրես»-ի՝ հրթիռներից մեկը ընկել է Իրանի գերագույն առաջնորդ այաթոլլա Ալի Խամենեիի գրասենյակի մոտ։ Ավելի ուշ Իրանի «Թասնիմ» լրատվական գործակալությունը հաղորդեց մայրաքաղաքում լրացուցիչ պայթյունների, ինչպես նաևч տարածքում խիտ ծխի մասին։

Իրանից ստացված նախնական հաղորդագրությունների հետ գրեթե միաժամանակ, Իսրայելի պաշտպանության նախարար Իսրայել Կացը հայտարարություն տարածեց, որով հաստատեց, որ Իսրայելի պաշտպանության ուժերը (ԻՊՈւ) «կանխարգելիչ հարված» են հասցնում Իրանին։

Այսօր, կեսօրին, Իսլամական հեղափոխության պահապանների կորպուսի (ԻՀՊԿ) ավիատիեզերական ուժերը հրթիռային հարձակումներ են իրականացրել Մերձավոր Արևելքում գտնվող ամերիկյան ռազմական բազաների՝ Կատարի Ալ Ուդեյդի, Քուվեյթի Ալ Սալեմի, ԱՄԷ-ի Ալ Զաֆրայի և Բահրեյնի ԱՄՆ Հինգերորդ նավատորմի բազայի վրա։

Այս իրադարձությունների միջազգային արձագանքի մասին այս պահի դրությամբ

Ռուսաստանի արձագանքը

Ռուսաստանի արտաքին գործերի նախարարությունը հայտարարություն է տարածել Իրանի դեմ ԱՄՆ-ի և Իսրայելի ռազմական գործողության մեկնարկի վերաբերյալ։ Մոսկվան Վաշինգտոնի և Թել Ավիվի գործողությունները բնութագրել է որպես «նախապես պլանավորված և չհրահրված ագրեսիա, որը կոպտորեն խախտում է միջազգային իրավունքը և Մերձավոր Արևելքը դնում է լիամասշտաբ աղետի եզրին»։

Մեդվեդևի արձագանքը

«Խաղաղարարը (նկատի ունենալով Դոնալդ Թրամփին) կրկին ցույց տվեց իր դեմքը»։

«Իրանի հետ բոլոր բանակցությունները քողարկում էին։ Ոչ ոք դրանում կասկած չէր ունենում։ Իրականում ոչ ոք չէր ուզում որևէ բանի շուրջ բանակցել։ Հարցն այն է, թե ով ունի համբերություն՝ սպասելու իր թշնամու անփառունակ վախճանին»։

Ըստ Մեդվեդևի՝ «Միացյալ Նահանգները ընդամենը 249 տարեկան է», մինչդեռ «Պարսից կայսրությունը հիմնադրվել է ավելի քան 2500 տարի առաջ»։

Չինաստանի արձագանքը

Չինաստանը խիստ մտահոգված է Իրանի դեմ ԱՄՆ-ի և Իսրայելի ռազմական հարվածներով, և Իրանի ինքնիշխանությունը, անվտանգությունը և տարածքային ամբողջականությունը պետք է հարգվեն, հայտարարել է Չինաստանի արտաքին գործերի նախարարությունը շաբաթ օրը։

Իսպանիայի արձագանքը

Իսպանիան դարձավ ՆԱՏՕ-ի միակ երկիրը, որը դատապարտեց ԱՄՆ-ի և Իսրայելի կողմից Իրանի վրա հարվածները: Վարչապետ Պեդրո Սանչեսը հանդես եկավ Վաշինգտոնի և Թել Ավիվի միակողմանի գործողությունների դեմ:

«Իրանի վրա հարձակումը սրացում է ներկայացնում և նպաստում է ավելի անկայուն և թշնամական միջազգային կարգի հաստատմանը»,- հայտարարեց նա:

Ֆրանսիայի արձագանքը

Փարիզը ՄԱԿ-ի Անվտանգության խորհրդի նիստ է հրավիրում Իրանի դեմ ԱՄՆ-ի ռազմական գործողության մեկնարկից հետո։ Այս մասին փետրվարի 28-ին հայտարարեց Ֆրանսիայի նախագահ Էմանուել Մակրոնը։

Վերջինս ձեռնպահ է մնացել, գնահատական տալուց, նշելով միայն, որ ԱՄՆ-ի, Իսրայելի և Իրանի միջև պատերազմի բռնկումը լուրջ հետևանքներ կունենա խաղաղության և անվտանգության համար։

Թուրքիայի արձագանքը

ԱՄՆ-ի և Իսրայելի հարձակումը Իրանի վրա սպառնում է տարածաշրջանի ապագային և համաշխարհային կայունությանը, հայտարարել է Թուրքիայի արտաքին գործերի նախարարությունը։

Արաբական ծոցի երկրների արձագանքները

Սաուդյան Արաբիան դատապարտում է Իրանի կողմից ԱՄԷ-ի, Բահրեյնի, Կատարի, Քուվեյթի և Հորդանանի ինքնիշխանության բացահայտ խախտումը և իր լիակատար համերաշխությունը հայտնում այդ պետությունների հետ։

Նույնանման հայտարարություններով են հանդես եկել Ծոցի մյուս արաբական երկրները՝ Բահրեյնը, Քաթարը, ԱՄԷ-ն:

Հետաքրքիր է, որ միակը Ծոցի երկրներից, որը չդատապարտեց Իրանին, Օմանն էր, որտեղ չկան ամերիկյան ռազմակայաններ:

Ավելին, այդ երկրի ԱԳ ղեկավար Բադր ալ-Բուսաիդին հայտարարեց, որ ԱՄՆ-ի և Իսրայելի հարվածները, ԱՄՆ-ի և Իսրայելի հարձակումը Իրանի վրա խաթարեց  միջուկային հարցի շուրջ Իսլամական Հանրապետության հետ ակտիվ բանակցային գործընթացը։

Հետաքրքիր է, որ Իրանին սահմանակից երեք կովկասյան երկրները հայտարարություններով հանդես չեկան այս իրադարձությունների կապակցությամբ, ինչը ցույց է տալիս, որ այս երկրները դեռ կայացման փուլում են,և բացի սեփական քաղաքացիներին հորդորելուց հրաժարվել մեկնել Իրան, կամ Իսրայել, այլ գնահատականներ չգտան՝ արտահայտվելու համար:

Հենց նման իրադարձությունների ժամանակ են պարզ դառնում այս կամ այն երկրի դիմագիծն ու իրական մտադրությունները:

Մեր պարագայում, նաև այդ ամենի բացակայությունը:

Սա է իրականությունը:

Արտակ Հակոբյան
Zham.am