Սա հիշեցնում է ընտրակաշառք, թոշակները բարձրացնելու միջոցառման տակ բյուջեով ընդհանրապես գումար դրած չկա. Հրայր Կամենդատյան

Նախօրեին Նիկոլ Փաշինյանը, իսկ այսօր արդեն ԱՍՀ նախարար Արսեն Թորոսյանը հայտարարեցին, թե ապրիլի 1-ից 10 հազար դրամով բարձրացնում են թոշակները։ 2026 թվականի պետական բյուջեում սակայն նման ծախսեր նախատեսված չեն։ Խնդրի շուրջ Panorama.am-ը զուրցեց «ՀայաՔվե» քաղաքացիական նախաձեռնության անդամ, տնտեսագետ Հրայր Կամենդատյանի հետ։

Հ. Կամենդատյան-Բյուջեում այդ գումարները չկան, սա առաջինը վկայում է, որ այն միանգամյա գործարք է, ավելի շատ հիշեցնում է ընտրակաշառք, որովհետև բյուջետային պլանավորում այդ թեմայով չի իրականացվել։ Տարեկան 60 մլրդ դրամ արժեցող այս միջոցառման տակ բյուջեով ընդհանրապես գումար դրած չկա։

Սա նշանակում է, որ այլ ծրագրերից պետք է գումարներ վերցնեն, բյուջեի ծախսային հոդվածներից պետք է տեղաշարժ կատարեն՝ սոցիալական բազմաթիվ հարցեր, պաշտպանության ծախսեր, պետության կենսագործունեության բազմաթիվ հարցերից մոտավորապես 60 մլդ դրամ վերցնելու են, որպեսզի այս նախընտրական ընտրակաշառքը ձևակերպեն, կատարեն։ Այստեղ խնդիրներ շատ կան բայց պետք է հստակ արձանագրել, որ գոնե մեր աշխատանքով այս գումարների հետ կապված այս ամբողջ պատմությունն իրականացվեց և մարդիկ գոնե հնարավորություն ունեցան լրացուցիչ 10 հազար դրամ ունենալու։

Բայց «ՀայաՔվեն» առաջարկում է, որ պետք է 50%-ով բարձրացնենք թոշակները և տարեկան կատարենք թոշակների ինդեքսավորում։

 Երկրորդ՝ Աշխատանքի և սոցիալական հարցերի նախարար Արսեն Թորոսյանն ընդամենը երկու օր առաջ հեռուստաեթերում պնդում էր, որ ես պոպուլիստ եմ, բյուջեից չեմ հասկանում, թոշակի համար նման թվեր չկան։ Էս մարդն հիմա ինչ խղճով է մնալու և աշխատելու իր պոստում։ Երկու օր առաջ հեռուստաեթերում հայտարարում էր, որ փող չկա, իսկ ովքեր պնդում են, չեն հասկանում, չգիտեն և այլն։

 Կարևորագույն հարցն այն է, որ հիմա թոշակառուներին 10 հազար դրամի որոշակի օգուտ եղավ, որը ընդամենը 20 %-ի թեմա է, բայց մենք առաջարկում ենք 50% և այդ պայքարից չենք հրաժարվում։ Հայաստանում իշխանության պետք է գա այն խումբը, ով թոշակառուներին խոստանում է 50%-ով բարձրացնել թոշակները։

Panorama.am-Համաշխարհային բանկը վեջերս հրապարակած զեկույցում Հայաստանին առաջարկել էր կրճատել բյուջեի դեֆիցիտը, մասնավորապես՝ պաշտպանության ոլորտի ծախսերը կրճատելով։ Կառավարությունն այս ուղղությա՞մբ է գնում՝ առանց բյուջետավորման հայտարարելով թոշակների և նպաստների բարձրացման մասին։

Հ. Կամենդատյան- Համաշխարհային բանկի, Արժույթի միջազգային հիմնադրամի և մյուս կառույցների խորհուրդներով Երկրագնդի վրա տասնյակ պետություններ են քանդվել։ Իրենք, որ ասում են վերցրեք պաշտպանությունից, ես այլ բան եմ առաջարկում։ 2018 թվականից հետո դատախազության, տարատեսակ դատարանների, պարեկային հատուկ ծառայության, մնացած ռեպրեսիվ օրգանների ֆինանսավորումները փոխվել են և մինչև 2025 թվականն անընդհատ աճել են։ Դա նշանակում է նրանց պարգևավճարների հատկացում, աշխատավարձերի բարձրացում, նոր տեխնիկայի ձեռքբերում, այլ տեխնիկական հարցերի կարգավորում և այդ տարբերությունն այս 7 տարվա ընթացքում կազմելէ 110 մլրդ դրամ, եթե սրան գումարում ենք պարգևավճարների տարեկան 25 մլրդ դրամի ֆոնդն, ապա այն դառնում է 135 մլրդ դրամ։ Մենք թոշակները 50%-ով բարձրացնելու աշխատանքի մեջ հստակ ֆինանսատնտեսական հիմնավորումները դրել ենք։

Մանրամասները՝ տեսաձայնագրությունում։