Ընտրությունները կեղծելու համա՞ր են Փաշինյանի ժամանակին ասած՝ «եվրոյոնջաները» Հայաստանում «դեսանտ» իջեցնում

Ինչպես է ԵՄ-ն ծրագրում միջամտել Հայաստանի ներքին գործերին և, ըստ էության, կեղծել առաջիկա ընտրությունների արդյունքները, որպեսզի ամեն գնով պահպանի պատերազմի հրահրիչ, հազարավոր զինվորների մահվան մատնած, Արցախը ուրացած, Արարատը մերժող, Հայ առաքելական եկեղեցու դեմ պատերազմող, Ալիևի մրցանակային «եղբայր» Նիկոլ Փաշինյանի բռնատիրական ռեժիմը: 

Որոշ մանրամասներ կարելի է իմանալ «Ազատություն» ռադիոկայանի հրապարակումից։ Ըստ այդմ՝ Եվրամիությունը պատրաստվում է օգնել Հայաստանին հունիսին նախատեսված խորհրդարանական ընտրություններում Ռուսաստանի միջամտությունից խուսափելու համար՝ նախ տեղակայելով Կրեմլի ապատեղեկատվության դեմ պայքարող «հիբրիդային արագ արձագանքման խումբ», ապա հնարավոր է՝ Հարավային Կովկասի այս երկրում ավելի մշտական քաղաքացիական առաքելություն։

«Ազատություն» ռադիոկայանի տրամադրության տակ է Հայաստանի արտաքին գործերի նախարարի՝ Բրյուսել հասցեագրված նամակը, որով Արարատ Միրզոյանը փետրվարի 13-ին խնդրել է արագ արձագանքման խումբ ուղարկել Երևան։ ԵՄ-ն նմանատիպ՝ մոտ 20 հոգանոց խումբ էր ուղարկել Քիշնև՝ անցյալ տարվա խորհրդարանական ընտրությունների ժամանակ՝ աջակցելու Մոլդովայի իշխանություններին սոցիալական ցանցերում Ռուսաստանից տարածվող ապատեղեկատվության վաղ հայտնաբերման և հակազդման գործում։

Ե՛վ Բրյուսելը, և՛ Քիշնևը այդ նախագիծը հաջողված են համարել, և Եվրամիությունն այժմ ցանկանում է նույնն իրականացնել նաև Հայաստանի համար՝ կարևորագույն ընտրությունների շեմին, որոնց վրա, ինչպես սպասվում է, Ռուսաստանը կփորձի ազդել։

Նախապատմություն. Բրյուսելում քննարկումներից ստացված դիվանագիտական նոտաների համաձայն՝ ԵՄ-ն մտադիր է «աջակցություն հայտնել Հայաստանի ժողովրդավարական դիմադրողականության և տեղեկատվական ամբողջականության ամրապնդմանն ինչպես 2026 թվականի հունիսի ընտրություններից առաջ, այնպես էլ Հայաստանի և Ադրբեջանի միջև ընթացող խաղաղության գործընթացի ընթացքում», հավելելով, որ «Հայաստանին առաջարկվող աջակցությունը պետք է հստակորեն ուղղված լինի Ռուսաստանի կողմից ապակայունացնող գործունեության նվազեցմանը և մեղմացմանը»։

«Ազատության» տեղեկություններով՝ ԵՄ անդամ երկրները նաև դիմել են դիվանագիտական կորպուսին՝ արտաքին հարաբերությունների ծառայությանը՝ հորդորելով «շարունակել կապը Ադրբեջանի հետ՝ բացատրելով ԵՄ-ի կողմից Հայաստանին ցուցաբերվող աջակցության նպատակը և ընդգծել խաղաղության գործընթացի վրա բացասական ազդեցությունից խուսափելու անհրաժեշտությունը»։
--
Մեր կողմից նկատենք, որ սա, ըստ էության, կարող է մեկնաբանվել որպես Հայաստանի ներքին գործերին կոպտագույն միջամտություն է: Ու շատ ճարպիկ է ձևակերպված. երևակայական ինչ-որ «ռուսական միջամտություն» կանխելու համար, ԵՄ-ն պատրաստվում է հատուկ պատրաստված խմբեր գործուղել Երևան: