Հենց մեր տան դիմաց էր. Կրակոցի ձայնից դաշտում խաղացող երեխաները փախան. Աջափնյակի արյունալի կրակոցների ականատես

Մենք հենց դիմացի շենքում ենք ապրում, կրակոցների ձայնը մենք լսեցինք, դաշտում խաղացող երեխաները վախից փախան, նրանցից մեկը նույնիսկ վախից ընկավ։ Այս մասին, այսօր՝ փետրվարի 18–ին, լրագրողների հետ զրույցում նշեց Երևանի Աջափնյակ թաղամասի բնակիչներից մեկը, որտեղ այսօր ցերեկը կրակոցներ էին հնչել։

«Դրանից հետո մեծ թվով երիտասարդներ մեր շենքի դիմացով անցան։ Երեխաները դաշտում էին խաղում, ձայնը այնքան բարձր էր, որ երեխեքը վախից փախան։ Ես  չգիտեմ՝ վիրավորներ կան, թե ոչ, տնից դուրս չենք եկել, որ իմանանք։ Վերևից ենք տեսել, դեմքերը չենք տեսել, չգիտեմ՝ որտեղի բնակիչ էին»,–ասաց նա՝ հավելելով, որ ոստիկանությունն իր տեղում չի, որ նման բաներ են լինում։

«Եթե նման բաներ են լինում, իրենք լավ գիտեն՝ ովքեր են»,–ասաց նա։

Ավելի վաղ NEWS.am–ը հայտնել էր, որ այսօր՝ փետրվարի 18-ին, մարտաֆիլմ հիշեցնող կրակոցներ են հնչել Աջափնյակ թաղամասի Աբելյան փողոցի 9 հասցեում. կան վիրավորներ։ Համացանցում տեսանյութ է տարածվել, որտեղ երևում են, թե ինչպես են մի խումբ անձինք կրակում միմյանց վրա։

Shamshyan.com-ի հաղորդմամբ, նշված վայրից հրազենային վնասվածքներով 10 քաղաքացիներ տեղափոխվել են Երևանի տարբեր հիվանդանոցներ։ Դեպքի վայրում հայտնաբերվել են ինքնաձիգից և ատրճանակից կրակված մի քանի պարկուճներ, արնանման հետքեր, դանակ, «Lexus» մակնիշի ավտոմեքենա, որի վրա առկա են կրակոցի հետքեր։

«Արմենիա» ԲԿ-ի Գլխավոր տնօրենի վիրաբուժության գծով տեղակալ Աշոտ Կուրղինյանը NEWS.am–ին հայտնել է, որ իրենց մոտ է տեղափոխվել 7 մարդ։ Նրանցից մեկը մահացել է, երկուսի վիճակը ծայրահեղ ծանր է, մյուսների վիճակը կայուն ծանր է։ Նրանցից 2–ի կյանքին, հնարավոր է՝ վտանգ է սպառնում։ Այս պահին վիրահատարանում են, չեմ մարող ավելի ստույգ ասել՝ կյանքին վտանգ կա, թե ոչ։ Չեմ կարող նաև հստակ ասելէ՝ վնասվածքները կրակոցներից է, թե ծակած–կտրած վերքեր են։ Ավելի շատ կրակոցի են նման»։

Այս պահին քրեական և համայնքային ոստիկանները պարզում են վիրավորների, «Lexus»-ի սեփականատիրոջ ինքնությունը։

Դեպքի վայրում են փոխոստիկանապետերը, ոստիկանապետ Կամո Ցուցուլյանը

Այս առնչությամբ, ՆԳՆ–ից NEWS.am–ին հայտնեցին. «ՆԳՆ ոստիկանության ծառայողները ձեռնարկում են անհետաձգելի օպերատիվ-հետախուզական միջոցառումներ դեպքի բոլոր հանգամանքները պարզելու ուղղությամբ։ Կտրվի լրացուցիչ տեղեկատվություն»։