Կեղծիքն արդեն սկսվել է․ ընտրություններից 1 ամիս առաջ մեծ միջամտություն է սպասվում․ Կարեն Իգիթյան

Կովկասագետ Կարեն Իգիթյանն այն կարծիքին է, որ ԱՄՆ փոխնախագահ Ջեյ Դի Վենսի այցը տարածաշրջան պետք է դիտարկել տարածաշրջանի վերահսկման համատեքստում։

«Հին մոտեցում է, որ եթե ուզում ես վերահսկել Հարավային Կովկասը, ապա երեք երկրից երկուսին գոնե պետք է վերահսկես, ուրիշ կերպ դա չի աշխատում Արևմուտքի համար։ Հայաստանն ու Ադրբեջանն այժմ ուղիղ ԱՄՆ վերահսկողության տակ են գտնվում, այս այցը հաստատում է դա։ Ադրբեջանի հետ, իհարկե, շատ ավելի լուրջ և գործնական բաներից են խոսել, եթե համեմատենք նրա հետ, թե ինչ են խոսել Հայաստանում»,- 168TV-ի «Ռեվյու» հաղորդման ընթացքում ասաց նա։

Ըստ նրա՝ Վենսի հայտարարություններից զատ, ավելի մեծ միջամտություն է սպասվում Հայաստանի ընտրություններին․ «Եվրոպական գագաթնաժողովը, որ իրականացվի Երևանում՝ ընտրություններից մեկ ամիս առաջ, այդ ժամանակ կտեսնենք՝ ինչքան հայտարարություններ են լինելու, որոնք միտված են լինելու նրան, որ Փաշինյանին ընտրություններից առաջ սատարեն։ Փաշինյանը շատ ձեռնտու է տարբեր ուժերի, առաջին հերթին՝ Թուրքիային և Ադրբեջանին․․․ Թրամփը Փաշինյանի մասին ասում էր՝ այն ուրիշ տղան, և իրենց համար նա ուղղակի էն ուրիշ տղան է, որը սպասարկում է ուրիշ երկրների շահերը, այս դեպքում՝ ԱՄՆ-ի, Թուրքիայի և Ադրբեջանի»։

Նա նկատեց, որ «Ռուսատոմ»-ի կողմից սպասարկվող հայկական ատոմակայանը փակվելու է, փոխարենը խոստանում են կառուցել ամերիկյան մոդուլային, որի համար Հայաստանը վճարելու է․

«Դա լինելո՞ւ է, թե՞ ոչ, մեծ հարց է, բայց Ռուսաստանին դուրս են մղում։ Նույնը վերաբերում է այլ հարցերին․ նպատակը Ռուսաստանին դուրս մղելն է, ոչ թե Հայաստանի զարգացումը։ Ադրբեջանն ԱՄՆ-ի համար ռազմավարական գործընկեր է հայտարարվել նախ՝ անվտանգության ոլորտում, երկրորդ՝ էներգետիկ անվտանգության, օրինակ՝ Վենսն ասում է, որ Ադրբեջանը ՆԱՏՕ անդամ 11 երկրի էներգետիկ անվտանգություն է ապահովում։ Այսինքն՝ այսպիսի ձևաչափով են արդեն խոսում»։

Անդրադառնալով իշխանական այն թեզերին, թե հիմա ԱՄՆ-ն է մեզ փրկելու, նա նկատեց, որ դա երբեք չի աշխատել և չի աշխատելու․ «Եթե դու հրաժարվում ես պաշտպանվել, հույսդ դնելով նրա վրա, որ այստեղ ամերիկյան կազմակերպություն կա, ապա դա կարող է շատ շուտ և շատ վատ վերջանալ քեզ համար»։

Կարեն Իգիթյանը շեշտեց՝ արտաքին ուժերը Փաշինյանին աջակցում են՝ իրենց շահերից ելնելով․

«Այդ շահերն Իրանին և Ռուսաստանին դուրս մղելու մասին է, այդ շահը դեստրուկտիվ է։ Փաշինյանն այդ երկրների դրածոն է։ Նա ակնհայտ ցույց է տալիս, որ կեղծելու է ընտրությունները։ Երբ իրենք ընտրություններից առաջ օրենք են ընդունում, որ ընտրությունները կարող են վերահսկել միայն այն կառույցները, որոնք մի քանի տարվա փորձ ունեն, սա կոնկրետ մի կազմակերպության՝ «ՀայաՔվեի» դեմ է ուղղված, ապա հարց է առաջանում՝ ինչո՞ւ չեն ուզում, որ այդ մարդիկ գտնվեն այնտեղ և տեսնեն՝ ինչ է կատարվում։ Շատ պարզ պատճառով, որ իրենք նախապատրաստվում են ընտրությունները կեղծելուն։

Ուրիշ պատճառ չկա՝ այս կոպտագույն խախտումն իրականացնելու, երբ դու խաղի կանոնը փոխում ես խաղի ժամանակ։ Ընդդիմությունը պետք է գիտակցի, որ կեղծիքն արդեն սկսել է, և դրա դեմ պետք է պայքարել»։

Մանրամասները՝ 168TV-ի տեսանյութում