Քննչական մարմինն ու դատախազությունը Սամվել Կարապետյանին տեսաուղերձով հանդես գալու հնարավորություն չեն տվել. Արամ Վարդևանյան

Այսօր տեղի ունեցով «Ուժեղ Հայաստան» կուսակցության համագումարը, որի ժամանակ հայտարարվեց՝ կուսակցության առաջնորդն ու իրենց վարչապետի թեկնածուն ազգային բարերար Սամվել Կարապետյանն է:

Այս լուրը խախտեց ՔՊ-ական ու ՔՊ-ամերձ շրջանակների հավասարակշռությունը, և ՔՊ-ի օրգան civic.am-ը շտապեց կառչել ոչ միայն Սահմանասդրության հետ կապված քննարկումներից, այն Սահմանադրության, որը Նիկոլ Փաշինյանն ու ՔՊ-ականները, սկսած 2018թ.-ից, սարքել են հատակի շոր ու վրան սրբում են ոտքերը, այն Սահմանադրությունից, որը ՔՊ-ական քաղաքական մեծամասնությունը Ազգային ժողովի իրենց մեծամասնությամբ փոխեց, որ Հրայր Թովմասյանը չլինի Սահմանադրական դատարանի նախագահ, այլև… Ուշադրություն… Համագումարում Սամվել Կարապետյանի ուղերձի ձևից:

Հատկանշական է, որ ՔՊ-ում չեն հասկացել դատարանի որոշման իմաստը, այլապես չէին գրի՝ «Թեպետ Սամվել Կարապետյանի հրապարակային խոսքի արգելքը հանված է, վերջինիս ուղերձն էլ ընտրողների «լայն զանգվածին» ներկայացրին արհեստական բանականությամբ»:

168.am-ի հետ զրույցում Սամվել Կարապետյանի պաշտպանական խմբի անդամ, սահմանադրագետ Արամ Վարդևանյանը, անդրադառնալով հրապարակմանն ու այնտեղ բերված փաստարկներին, ասաց՝ իսկապես ինչ-որ տեղ զարմանալի էր, որ նման հարց առհասարակ առաջացել է:

«Սամվել Կարապետյանի հրապարակային խոսքով հանդես գալու սահմանափակումը վերացվել է, սակայն տեսա կամ ձայնային ուղերձով հանդես գալու հնարավորությունը որևէ կերպ ամրագրված չէր: Այդ իսկ պատճառով նշված հարցի վերաբերյալ իմ կողմից ներկայացվել էր դիմում-հարցում թե՛ քննչական մարմնին և թե՛ հսկող դատախազին, որպեսզի հնարավորություն ընձեռվեր, որ Սամվել Կարապետյանը հրապարակային հենց տեսաձայնային ուղերձով հանդես գար»,- ասաց Արամ Վարդևանյանը:

Նրա խոսքով սաայն քննչական մարմնից ստացված պատասխանն ըստ էության համարժեք էր մերժմանը, իսկ դատախազությունից մինչ օրս որևէ պատասխան չեն ստացել:

«Իսկ ելնելով այն իրավիճակից, որ Սամվել Կարապետյանի դեպքում շուրջ 200 օր կալանքն է եղել որպես խափանման միջոց բացառապես «մեր ձևով» եկեղեցու պաշտպանությանը մասնակցելու արտահայտության համար, կարծում եմ՝ առավել քան հստակ է, թե փաստաբանական թիմն ինչ դիրքորոշում պետք է ունենար՝ արդյո՞ք նման տեսաուղերձը թույլատրելի՞ կլիներ, թե՞ ոչ, թե՞ կհանդիսանար որպես խափանման միջոցի պայմանների հնարավոր խախտում: Այդ իսկ պատճառով իրավիճակն այն է, որ կարող ենք արձանագրել՝ քննչական մարմինն ու դատախազությունը Սամվել Կարապետյանին տեսաուղերձով հանդես գալու հնարավորություն չեն տվել»,-ասաց Սամվել Կարապետյանի փաստաբանական թիմի անդամը:

Վերջինս նկատեց՝ միգուցե այս քննարկումը լավ առիթ է՝ արձանագրելու այն, որ Սամվել Կարապետյանի նկատմամբ քաղաքական հետապնդումը, որը սկիզբ է առել 2025թ. հունիսի 17-ից, արդեն վերածվել է մեկ այլ բնույթի քաղաքական հետապնդման, քանի որ Սամվել Կարապետյանը այլևս հանդիսանալով քաղաքական գործընթացի ակտիվ մասնակից, ունի անհավասար պայման՝ ելնելով քաղաքական հետապնդումից, որն էլ իրականացվումէ  մեկ այլ քաղաքական ուժի կողմից ձևավորված իշխանության ներկայացուցիչների կողմից:

«Հետևաբար ուզում էի հատուկ արձանագրել, որ ստեղծված իրավիճակում, երբ խափանման միջոցը արդեն 8 ամիս է, ինչ կիրառված է, և որևէ մի անգամ դրա նույնիսկ նվազագույն մեկնաբանման տիրույթում անգամ խախտման մասին խոսք չի եղել, ակնհայտ է, որ Սամվել Կարապետյանի նկատմամբ կիրառված խափանման միջոցը պետք է վերացվի անհապաղ՝ նաև ելնելով քաղաքական և քաղաքացիական իրավունքների, մրցակցության, հավասարության երաշխիքների ապահովման տեսանկյունից»,-ասաց Արամ Վարդևանյանը:

Ի դեպ, Սամվել Կարապետյանի միջազգային փաստաբան Ռոբերտ Ամստերդամը ևս հատուկ հայտարարությամբ էր հանդես եկել բարերարի ուղերձի և դրա ձևի մասին:

«Նա այսօր մեզ հետ չէ, որովհետև վարչապետի աթոռը զբաղեցնող անձը վախենում է նրանից և զրկել է նրան խոսքի ազատությունից։ Բայց նրանք մի բան սխալ էին հաշվարկել այս պատմության մեջ. քաղաքական բանտարկությունը երբեք չի կարող բանտարկել գաղափարը։ Եվ հիմա մենք պատրաստվում ենք անել պատմության մեջ աննախադեպ մի բան. մենք անակնկալ ենք պատրաստել. երկրի ապագա առաջնորդի ուղերձը կընթերցի Սամվել Կարապետյանի փաստաբանը՝ արհեստական բանականության օգնությամբ»,-ասել էր Ռոբերտ Ամստերդամը: