Բոլորը մեղավոր են, բացի ՔՊ-ից․ Երևանում ձյունը հալեց, խնդիրները՝ եռապատկվեցին (տեսանյութ)

Երևանի ճանապարհների աղետալի վիճակի համար քաղաքային իշխանությունները մեղավոր են համարում բոլորին՝ քաղաքացիներին, եղանակային պայմանները, ձյունն ու անձրևը, բայց ոչ երբեք իրենց։ Մինչդեռ հենց քաղաքապետարանի լիազորությունների մեջ է մտնում ասֆալտապատման և փոսալցման աշխատանքների վերահսկողությունը՝ սահմանված չափորոշիչներին համապատասխան․ նշում է «Մայր Հայաստան» դաշինքի անդամ Սոնա Աղեկյանը։

Որպես օրինակ՝ Աղեկյանը մատնանշում է Տիգրան Մեծի պողոտայում իրականացված աշխատանքները, ինչը կատարվել է անորակ ու տգեղ կարկատաններով, որոնք ոչ միայն չեն լուծում խնդիրը, այլև ավելի են վատթարացնում իրավիճակը։

«Այս տարվա ավազն ու աղը սև ցեխի է վերածվում։ Ավելի լավ է սառույցի վրայով քայլես, քան այդ կեղտի միջով»,–ասում է «Մայր Հայաստան» դաշինքի անդամը՝ հավելելով, որ այդ ցեխը փոշու է վերածվում, վնասում մեքենաները և մարդկանց կոշիկների հետ տեղափոխվում շենքեր ու հիմնարկներ։

Սոնա Աղեկյանի համոզմամբ՝ քաղաքապետարանը գործում է կարճաժամկետ մտածելակերպով՝ առանց հաշվի առնելու հետևանքները։ Աղեկյանի խոսքով՝ տպավորություն է ստեղծվում, որ առաջնահերթությունը ոչ թե որակյալ աշխատանքն է, այլ գումարների յուրացումը տարբեր ծրագրերի և պայմանագրերի միջոցով։ Քննադատների պնդմամբ, խնդիրը ոչ միայն շինարարական աշխատանքների որակն է, այլև դրանց իրականացման ընթացքում վերահսկողության գրեթե լիակատար բացակայությունը։

Աղբյուրը՝ oragir.news