Ապշեցուցիչ զուգադիպություն է. դատավճիռը հրապարակվեց Փաշինյանի և Ալիևի՝ Էմիրություններում «Մարդկային եղբայրության համար» մրցանակ ստանալու հաջորդ օրն իսկ. «Լազարևյան ակումբ»

Բաքվում Լեռնային Ղարաբաղից գերեվարվածների նկատմամբ հաշվեհարդարը կամայականության և դավաճանության ամոթալի հաղթանակ է. Բաքվի այսօրվա ֆարսին է անդրադարձել միջազգային «Լազարևյան ակումբ»-ը:

«Բաքվի ադրբեջանական զինվորական դատարանը հրապարակել է Լեռնային Ղարաբաղի Հանրապետության ղեկավարների դատավճիռները, ովքեր գերեվարվել էին 2023 թվականին՝ Լեռնային Ղարաբաղի գրավման գործողության ժամանակ։ ԼՂՀ նախկին նախագահներ Արկադի Ղուկասյանը և Բակո Սահակյանը դատապարտվել են 20 տարվա ազատազրկման, նրանց հաջորդող Արայիկ Հարությունյանը՝ ցմահ ազատազրկման։ Մյուս բոլորը, բացառությամբ պետնախարար Ռուբեն Վարդանյանի (ում գործն առանձնացվել է առանձին վարույթի՝ հակառակ իր պահանջի), դատապարտվել են 15 տարուց մինչև ցմահ ժամկետների։

Այսպես կոչված բաքվի արդարադատության մեղադրական նյութերը լի են «սեպարատիզմի», «ապօրինի զինված դիմադրության» և Ադրբեջանի օրենքների խախտման մասին դատարկաբանություններով, մինչդեռ ամբաստանյալները երբեք չեն եղել այդ երկրի քաղաքացիներ։ Ադրբեջանի իշխանությունները, որոնք 1994-ին ակտիվ ռազմական գործողությունների ավարտից հետո քառորդ դար շարունակ հանդիպում էին այժմ դատապարտվածների հետ հակամարտության կարգավորման բանակցային հարթակներում՝ ԵԱՀԿ Մինսկի խմբի, ՄԱԿ-ի և այլ միջազգային կազմակերպությունների հովանու ներքո, դեռևս մինչև դատավարությունը Արցախի Հանրապետության (ԼՂՀ) բոլոր գերեվարված ղեկավարներին անվանեցին հանցագործներ՝ մեղադրելով բոլոր հնարավոր մեղքերի մեջ։

Իրականում Բաքվում այսօր՝ փետրվարի 5-ին, դատապարտեցին Լեռնային Ղարաբաղի հայ բնակչության ինքնորոշման իրավունքը, որն արտահայտվել էր Խորհրդային Միության փլուզման գործընթացում։ Սա հաշվեհարդար էր, դատաստան, այլ ոչ թե դատարան։ Եվ տեղի ունեցածի համատեքստում աշխարհի նույնիսկ ամենաանհասկացող մարդիկ պետք է հասկանան, թե ինչու հայերը՝ բոլորը մինչև վերջին մարդը, ստիպված եղան լքել իրենց հողը, տները, գերեզմաններն ու եկեղեցիները օկուպացված Լեռնային Ղարաբաղում։

Ապշեցուցիչ զուգադիպություն է. դատավճիռը հրապարակվեց հաջորդ իսկ օրը այն բանից հետո, երբ Հայաստանի վարչապետ Նիկոլ Փաշինյանը Ադրբեջանի նախագահ Իլհամ Ալիևի հետ միասին Էմիրություններում ստացավ «Մարդկային եղբայրության համար» մրցանակը։ Ալիևի հետ Փաշինյանի եղբայրության հարցում կարելի է չկասկածել։ Ինչպես նաև Փաշինյանի դավաճանության հարցում, ով թույլ տվեց Լեռնային Ղարաբաղի հանձնումը և իր հայրենակիցների վտարումը պատմական հողերից։ Հայաստանի կառավարությունը և Նիկոլ Փաշինյանը, ովքեր շեմեր են մաշում Թուրքիայում, ԱՄՆ-ում, Արևմուտքի երկրներում և Ռուսաստանում՝ իրենց վերընտրվելու համար, մատը մատին չխփեցին իրենց հայրենակիցներին, մեր ընկերներին ու դաշնակիցներին գերությունից ազատելու համար։ Այս ամոթն այժմ հավերժ կմնա նրանց հետ։

Միջազգային ռուս-հայկական «Լազարևյան ակումբը» կամայականությունն ու դավաճանությունը կոչում է իրենց անուններով և պահանջում է բաքվի բանտերից ազատ արձակել բոլոր ապօրինի պահվող և ապօրինի դատապարտված գերիներին՝ լինեն դրանք Լեռնային Ղարաբաղի Հանրապետության ղեկավարներ, Հայաստանի Հանրապետության քաղաքացիներ, թե Ռուսաստանի Դաշնության քաղաքացիներ, ովքեր դարձել են Ադրբեջանի սանձարձակ իշխանությունների վրեժխնդրության զոհը։

Լազարևյան ակումբի խորհրդի անունից և հանձնարարությամբ՝ Կոնստանտին Զատուլին Խորհրդի համակարգող»:
Աղբյուր՝ 168.am