Ադրբեջանի ու Հայաստանի իշխանությունների ամենաթողության մասին լռելը հանգեցնելու է նոր աղետների. Ակցիա ԱԺ դիմաց

«Իլհամ Ալիևն իր ու իր փոքրիկ գործընկեր Նիկոլ Փաշինյանի ամենաթողությամբ փորձում է տարածաշրջանում հաստատել հակաժողովրդավարական համակարգ։ Մենք այսօր եկել ենք բարձրաձայնելու այն անարդարությունների մասին, որոնք տիրում են։ Դրա մասին լռելը, չխոսելը հավասարազոր են հանցագործության, դրա դեմը չառնելը հավասարազոր է հանցագործության»,-ԱԺ դիմաց ընթացող ակցիայի ժամանակ, հեռակա դիմելով  ԱԺ այցելած Եվրոպայի խորհրդի մարդու իրավունքների հանձնակատար Մայքլ Օ’Ֆլահերթիին, հայտարարեց  ՀՀԿ խորհրդի անդամ Հայկ Դերզյանը։

Հիշեցնենք, որ Ազգային Ժողովի շենքի մոտ Հայաստանի Հանրապետական կուսակցությունը նախաձեռնել է  ակցիա՝ ի պաշտպանություն Հայաստանի բոլոր քաղբանտարկյալների եւ Բաքվի բանտերում նստած մեր հայրենակիցների։ Ակցիան կազմակերպվել է Մայքլ Օ’Ֆլահերթիի ԱԺ այցի կապակցությամբ։

ՀՀԿ-ականը նշեց, որ իշխանությունները ԵԽ մարդու իրավունքների հանձնակատարին ներկայացնում են կեղծ տեղեկանքներ, ժողովրդավարության մասին հանդես են գալիս տարատեսակ հայտարարություններով, որոնք որևէ կերպ կապ չունեն իշխանության վարած քաղաքականության հետ։

Բանախոսն ընդգծեց՝  ԵՄ դոկտրինը, արմատներն ի սկզբանե եղել են ժողովրդավարության, ազատ խոսքի, ազատ տեղաշարժի, իրավունքի կոնտեքստում, և այս ամենի ֆոնին լռել, չբարձրաձայնել, չստիպել, որ Ադրբեջանի ու Հայաստանի իշխանությունները վերջ տան ամենաթողությանը, հանգեցնելու է նոր աղետների։

Աղբյուրը` Panorama.am