Թագավորական անձնակազմը հրաժարվել է աշխատել նախկին արքայազն Էնդրյուի համար․ The Sun

Սանդրինգհեմի թագավորական կալվածքի սպասարկող անձնակազմը հրաժարվել է աշխատել Մեծ Բրիտանիայի թագավոր Չարլզ III-ի եղբոր՝ Էնդրյու Մաունթբեթեն-Վինձորի համար՝ մանկապղծության մեջ մեղադրված ամերիկացի ֆինանսիստ Ջեֆրի Էփշտեյնի հետ նրա ընկերության պատճառով։ Այս մասին հայտնել է The Sun թերթը՝ հղում անելով իր աղբյուրներին։

Մաունթբեթեն-Վինձորը, ով Էփշտեյնի հետ կապերի պատճառով զրկվել էր արքայազնի և Յորքի դքսի տիտղոսներից, փետրվարի 3-ի երեկոյան տեղափոխվել է Անգլիայի արևելքում գտնվող կալվածք։ Նախկինում նա բնակվում էր Լոնդոնի մոտակայքում գտնվող Վինձորի ամրոցի տարածքում տեղակայված Royal Lodge նստավայրում։ Պարբերականի տեղեկություններով՝ Սանդրինգհեմի անձնակազմի անդամներին հնարավորություն է տրվել հրաժարվել թագավորի եղբոր համար աշխատելուց, եթե նրա ներկայությունից անհանգստություն զգան։ Թերթի աղբյուրը նշել է, որ արդեն ձևավորվել է այն մարդկանց «երկար ցուցակը», ովքեր օգտվել են այդ հնարավորությունից։

«Մարդիկ, ովքեր տարիներ շարունակ աշխատել են նրա հետ, հեռացել են։ Լավագույն դեպքում կմնա նվազագույն հաստիքակազմ։ Հնարավոր է՝ կյանքում առաջին անգամ նա ստիպված լինի ինքնուրույն բացել մարդկանց առջև մուտքի դուռը», - The Sun-ին հայտնել է մեկ այլ զրուցակից։

Նշվում է, որ ներկայումս 65-ամյա Մաունթբեթեն-Վինձորը բնակվում է Wood Farm քոթեջում, սակայն սպասվում է, որ ապրիլից նա կտեղափոխվի Marsh Farm ֆերմերային տունը, որը նույնպես գտնվում է Սանդրինգհեմի կալվածքի տարածքում։

2019 թվականին արքայազն Էնդրյուն ստիպված է եղել հրաժարվել թագավորական ընտանիքի անդամի պաշտոնական պարտականությունների կատարումից՝ Էփշտեյնի գործով բռնկված սկանդալի պատճառով։ Դա տեղի է ունեցել այն բանից հետո, երբ ամերիկուհի Վիրջինիա Ջուֆրեն մեղադրանքներ է հնչեցրել նրա հասցեին՝ հայտարարելով, որ նա այն տղամարդկանց թվում է եղել, որոնց հետ իրեն 17 տարեկան հասակում հարկադրել են սեռական հարաբերություն ունենալ։

2022 թվականին Ելիզավետա II թագուհու որոշմամբ արքայազնը զրկվել է պատվավոր զինվորական կոչումներից և մի շարք հասարակական կազմակերպությունների հովանավորի դերից։ 2025 թվականի հոկտեմբերի 17-ին արքայազն Էնդրյուն հայտարարել է, որ կդադարի օգտագործել Յորքի դքսի տիտղոսը։ Հոկտեմբերի 30-ին Բուքինգհեմյան պալատը հայտնել է, որ Էնդրյուն կզրկվի «արքայազնի» տիտղոսից, որը նրան բաժին է հասել ի ծնե, Էփշտեյնի հետ նրա ընկերության մասին նոր հրապարակումների ֆոնին։

Տարիներ շարունակ արքայազնը հերքել է Ջուֆրեի մեղադրանքները։ Սակայն այն բանից հետո, երբ կինը հայց է ներկայացրել նրա դեմ ԱՄՆ-ում, բրիտանական թագավորական ընտանիքի անդամը գնացել է վեճի արտադատարանական կարգավորման, ինչի համար կնոջը վճարել է փոխհատուցում, որի չափը, ըստ լրատվամիջոցների տվյալների, կարող է հասնել 12 միլիոն ֆունտի (մոտ 15 միլիոն դոլար)։
Աղբյուր՝ News.am