Աշխարհում իրավիճակն ավելի վտանգավոր կդառնա. Պեսկով
Աշխարհում իրավիճակն ավելի վտանգավոր կդառնա, եթե «Ռազմավարական հարձակողական սպառազինությունների կրճատման մասին» (ՌՀՍ) պայմանագիրը դադարի գործել: Այս մասին լրագրողներին հայտնել է Ռուսաստանի նախագահի մամուլի քարտուղար Դմիտրի Պեսկովը:
«Մի քանի օրից աշխարհը կմնա, հավանաբար, ավելի վտանգավոր վիճակում՝ համեմատած մինչ այժմ եղածի հետ։ Առաջին անգամ ԱՄՆ-ն և ՌԴ-ն, որոնք ունեն աշխարհի ամենամեծ միջուկային զինանոցները, կմնան առանց հիմնարար փաստաթղթի, որը կսահմանափակի և վերահսկողություն կսահմանի այդ զինանոցների նկատմամբ»,-ասել է նա:
Նա նաև նշել է, որ Կրեմլը ուշադիր հետևում է ԱՄՆ նախագահ Դոնալդ Թրամփի հայտարարություններին՝ Հնդկաստանի կողմից ռուսական նավթի գնումների հնարավոր դադարեցման վերաբերյալ։
«Մենք, անշուշտ, շատ ուշադիր հետևում ենք այս առնչությամբ բոլոր նորություններին, բնականաբար, շատ ուշադիր ենք նախագահ Թրամփի հայտարարությունների նկատմամբ, դրանք մանրակրկիտ արձանագրում ենք, վերլուծում և հարգանքով ենք վերաբերվում ամերիկա-հնդկական երկկողմ հարաբերություններին», — ասել է Կրեմլի ներկայացուցիչը:
Այնուամենայնիվ, ըստ Պեսկովի, ռուսական կողմը ոչ պակաս կարևորություն է տալիս Հնդկաստանի հետ ռազմավարական գործընկերության զարգացմանը։ Նա ընդգծել է, որ Ռուսաստանի համար այս պահին դա ամենակարևորն է։
Փետրվարի 2-ին Դոնալդ Թրամփը հայտարարել է, որ Հնդկաստանի վարչապետ Նարենդրա Մոդին համաձայնել է դադարեցնել նավթի գնումը Ռուսաստանից։ ԱՄՆ նախագահը նշել է, որ իր համար պատիվ է եղել «իր լավագույն ընկերներից մեկի» և «իր երկրի ազդեցիկ ու հարգված առաջնորդ» Նարենդրա Մոդիի հետ խոսելը։
Հետևեք մեզ Facebook-ում