Մենք հավատում ենք, որ Կարեն Ֆարխոյանը կիրականացնի «արդարադատություն»․ Արշակ սրբազանի փաստաբան

«Ունենք մի իրավիճակ, երբ  հանրային քրեական հետապնդում հարուցող դատախազը իր որոշման մեջ նկարագրել է իբր Արշակ սրբազանը կատարել է մի գործողություն։ Այդ գործողությունը թմրամիջոցների իրացման հետ ոչ մի առնչություն չունի»,- այս մասին լրագրողների հետ զրույցում ասաց Արշակ Սրբազանի փաստաբան Արսեն Բաբայանը։

Նրա խոսքով, եթե նույնիսկ իրականում տեղի ունեցած լիներ այդ գործողությունը, ապա անգամ այդ պայմաններում հնարավոր չէր լինի Արշակ սրբազանին մեղադրել այդ հոդվածով։

Հիշեցնենք, որ 2025-ի դեկտեմբերի 5-ին դատավոր Մասիս Մելքոնյանը բավարարեց Մայր աթոռի դիվանապետ Արշակ Սրբազանին կալանավորելու միջնորդությունը։ՔԿ-ից հայտնել էին. «Քրեական վարույթի նախաքննության ընթացքում անձի նկատմամբ հարուցվել է հանրային քրեական հետապնդում Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական հանաձայնությամբ թմրամիջոց ապօրինի իրացնելը՝ հանդիսադիր վայրում)»։  

Շարունակելով խոսքը Բաբայանը նշեց․ «Սրանից բացի, կալանքի միջնորդությունը զարտուղի ճանապարհներով գնում հասնում է մեր կողմից շատ «հարգված», շատ «օբյեկտիվ» դատավոր Մասիս Մելքոնյանին։ Մասիս Մելքոնյանը այս հանգամանքներում, երբ հիմնավոր կասկածը բացակայում է իմ նշված հիմնավորումներով, այնուամենայնիվ, կիրառում է երկու ամսյա կալանք։ Երկու ամիս անցնելուց հետո,միջնորդություն է  ներկայացվում է Շենգավիթի դատարան։ Այդ միջնորդությունը, կրկին զարտուղի ճանապարհներով, հասնում է Մասիվի դատարան՝ հույս ունենալով, որ կհանդիպի դատավոր Մասիս Մելքոնյանին, բայց պարզվում է, որ Մասիս Մելքոնյանը Հայաստանում չէ, այլ գտնվում է Ամերիկայի Միացյալ Նահանգներում։ Այնուհետև այս միջնորդությունը նույն զարտուղի ճանապարհներով պտտվում է և հասնում Կենտրոնի դատարան՝ դատավոր  Կարեն Ֆարխոյանին։ Մենք «հավատում» ենք, որ Կարեն Ֆարխոյանը կիրականացնի արդարադատություն և Աշակ սրբազանն ազատ կարձակվի»։

Լրագրողի դիտարկմանը, որ եթե իշխանության «սրտի» դատավորները չլինեն, ապա այլ որոշումներ կլինե՞ն, փաստաբանն արձագանքեց, որ ՝ այո, վստահ է դրանում։   

«Դուք կարո՞ղ եք հիշել որևէ քաղաքական ենթատեքստ ունեցող գործ, որը մակագրված լինի քիչ, թե շատ օբյեկտիվության համբավ ունեցող դատավորին, չի՛ եղել նման դեպք, երբեք չի՛ եղել»։

Ինչ վերաբերում է Արշակ սրբազանի գործով իրեղեն ապացույցի անհետանալուն, ապա Արսեն Բաբայանը ևս պաշտոնական տեղեկություն չունի այդ մասին, ասաց՝ կճշտի քննիչից։

Ավելի մանրամասն՝ տեսանյութում։
Աղբյուրը` Panorama.am