Ամեն ինչ արվում է, հավանաբար, որպեսզի Եպիսկոպոսաց ժողովը խափանվի, խաթարվի ու չկայանա. Նաթան Սրբազան

«Չեմ կարող հիմա կոնկրետ որևէ բան ասել՝ կայանալու է Եպիսկոպոսաց ժողովը, թե ոչ: Համենայնդեպս, Գերագույն հոգևոր խորհրդի 6 եպիսկոպոսների երկիրը լքելու արգելք կա»,-  լրագրողների հետ զրույցում ասաց Մայր Աթոռի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանը՝ պատասխանելով հարցին՝ արդյո՞ք կայանալու է Եպիսկոպոսաց ժողովը:

Ըստ Նաթան Սրբազանի՝ այս ամենը Եպիսկոպոսաց ժողովի կայացմանը խոչընդոտ է. «Եպիսկոպոսաց ժողովը պիտի  ունենա իր քվորումը և պիտի ունենա նաև եպիսկոպոսների ներկայությունը։ Հարցը միայն  քվորում ապահովելու խնդիրը չէ, ի վերջո կոլեգիալ հարցեր կան։ Ամեն պարագային ամեն ինչ արվում է, հավանաբար, որպեսզի այդ Եպիսկոպոսաց ժողովը ինչ-որ ձևով խափանվի, խաթարվի կամ չկատարվի»։

Հարցին՝ հնարավո՞ր է այն եպիսկոպոսները, որոնք չեն կարող լքել երկիրը, հեռավար մասնակցեն ժողովին, Նաթան Սրբազանը պատասխանեց. «Ոչինչ կոնկրետ չեմ կարող ասել, որովհետև ընդամենը երեկ է այդ ամենը եղել, որի համար պետք է քննարկել և որոշումներ առնել»։

Հարցին՝ քննարկվո՞ւմ է Նիկոլ Փաշինյանի հայտարարած «եկեղեցու բարենորոգման» արշավին միացած եպիսկոպոսների կարգալուծության հարցը, Նաթան Սրբազանը պատասխանեց, երբ նման քննարկումներ լինեն, կիմանան,  գաղտնի չեն պահելու, կտեղեկացնեն:

Հիշեցնենք, որ Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի տնօրինությամբ, 2025 թ. դեկտեմբերի 10-12-ը պետք է հրավիրվեր եպիսկոպոսաց ժողով՝ քննության առնելու Հայաստանյայց Առաքելական Սուրբ Եկեղեցու շուրջ վերջին զարգացումները և ներեկեղեցական կյանքին առնչվող հարցեր։ Սակայն դեկտեմբերի 12-ին Մայր Աթոռից հայտնել էին, որ Եպիսկոպոսաց ժողովի գումարումը ժամանակավորապես հետաձգվում է. «Նկատի ունենալով Հայաստանում տիրող ներկա իրավիճակը, մասնավորապես եկեղեցականների նկատմամբ իրականացվող բռնաճնշումները, այդ թվում՝ կալանավորումները, ընդառաջ եպիսկոպոսների խնդրանքին՝ Ամենայն Հայոց Կաթողիկոսի տնօրինությամբ եպիսկոպոսաց ժողովի գումարումը ժամանակավորապես հետաձգվում է»։

Արդեն այս տարվա Հունվարի 19-ին Մայր Աթոռի Տեղեկատվական համակարգի տնօրեն Եսայի քահանա Արթենյանը հայտնել էր, որ Ամենայն Հայոց Կաթողիկոս Գարեգին Բ-ի հրավերով Եպիսկոպոսաց ժողովը տեղի կունենա Ավստրիայի Սանկտ Փյոլթըն քաղաքում՝ փետրվարի 16-19-ին։ 
Աղբյուրը` Panorama.am