Հայաստանի դպրոցներում բուլինգի դեպքեր են գրանցվել

Հայաստանի դպրոցներում բուլինգի դեպքեր են արձանագրվել։ Այս մասին փետրվարի 2-ին կայացած մամուլի ասուլիսի ժամանակ հայտնել է Կրթության տեսչական մարմնի ղեկավար Վաղարշակ Մատիկյանը:

Տեսչական մարմնի ղեկավարը հստակ թիվ չի նշել, սակայն փաստել է, որ 2024 և 2025 թվականների տվյալները նման են։ Միևնույն ժամանակ, նախորդ տարիների համեմատ արձանագրվել է աճ, ինչը մասնագետները կապում են այս երևույթի վերաբերյալ ծնողների և մանկավարժների իրազեկվածության մակարդակի բարձրացման հետ։ Տեսչական մարմնի ղեկավարի խոսքով՝ ուսումնասիրությունները ցույց են տալիս, որ երևույթն առկա է գրեթե բոլոր երկրներում և կրթական համակարգի զարգացմանը զուգահեռ փոփոխվում է նաև բուլինգը։ Այսպես, որոշ երկրներում ի հայտ է եկել կիբերբուլինգը (առցանց հալածանքը)։ Քանի որ այս երևույթի դեմ պայքարը դուրս է տեսչական մարմնի գործառույթների շրջանակից, տվյալները փոխանցվում են այլ իրավասու կառույցների։