Այս պահին եկեղեցին ակնհայտորեն շահում է, որովհետև ավելացնում է իր բոնուսները, կշիռը. Լիլիթ Բլեյան

Փաշինյանն և իր խումբը որոշեցին՝ եկեղեցին իրենց համար վտանգավոր է, քանի որ եկեղեցին չի ենթարկվում իրենց ու սկսեցին արշավ եկեղեցու դեմ»,- Panorama.am-ի հետ զրույցում ասաց երգչուհի, երգահան Լիլիթ Բլեյանը։

Բացի այդ, ըստ նրա, եկեղեցու դեմ պայքար սկսելու նպատակներից մեկը եկեղեցու հեղինակությանը հարվածելն է, փորձել այնպես անել, որ եկեղեցուց վերցնեն իր վեհ, գեղեցիկ, փառահեղ շղարշը, որով պատված է. չէ՞ որ դա էլ եկեղեցու համար պաշտպանական մի շերտ է։

Մտավորականն ընդգծեց՝ ինչպես միշտ, մեդալն ունի երկու կողմ. «Նայելով քահանաների դեմքերին, որոնց չէի ճանաչում մինչ այս շարժումը, բացահայտումներ արեցի ինձ համար։ Եթե մինչ այս նրանք  ամեն մեկն իր թեմում, համայնքում, համայնքային բնակչության հետ էր աշխատում, դա էր իրենց պարտքը, այս պահին դարձել են քաջ զինվորներ.  հիմա քարոզչական պատերազմ է  ընթանում, ու որոշել են, որ կարող են վերցնել նաև այդ պայքարի ճակատը։ Պատասխանատվություն են վերցնում իրենց վրա ու իրենցից շատերն այսօր լցնում են այն դատարկությունը, որը  հասարակության ներսում առաջացել է։ Հաճախ ասում են՝ որտե՞ղ են մտավորականները, ինչո՞ւ չեն խոսում։ Ահա մտավորականության այդպիսի կուռ շերտ, որ մեզ համար բացահայտվեց։

Այնպես ստացվեց, որ այս պայքարի ընթացքում մեզ համար դրական իմաստով բացահայտում եղավ։  

Այս դեպքում մեդալի երկրորդ կողմն ավելի կարևորենք։ Գուցե իշխանությունները փորձում են հարվածել եկեղեցու հեղինակությանը, բայց նժարն անընդհատ տատանվում է, շատ դժվար է ասել, թե որն է ավելի ծանրանում։ Այս պահին գտնվում ենք պրոցեսի մեջ, վերջում կհասկանանք։ Այս պահին եկեղեցին ակնհայտորեն շահում է, որովհետև ինքն ավելացնում է իր բոնուսները, կշիռը։

Իշխանության փորձ ու ջանքերը համոզիչ չեն մարդու համար, ով եկեղեցում այլ բան է փնտրում։

Իրական հավատավոր մարդը եկեղեցու ներսում փնտրում է  այլ բան՝ ոչ թե խարդավանքների, դավադրությունների օջախ, այլ խոսք, մխիթարություն, հույս»։

Հարցազրույցն ամբողջությամբ՝ տեսանյութում։