Արցախից տեղափոխված Սլավիկ Համբարձումյանը դժվարությամբ է քայլում. հարազատներն առաջին անգամ հանդիպել են նրան

Օրերս Արցախից Հայաստան տեղափոխված 67-ամյա Սլավիկ Համբարձումյանի հարազատներն այսօր առաջին անգամ հնարավորություն են ունեցել Նուբարաշեի հոգեկան առողջության կենտրոնում տեսակցել նրան: NEWS.am-ի հետ զրույցում նրա ազգականը` Լիլիթ Սարդարյանը պատմեց, որ Սլավիկը տեսակցության ժամանակ հարազատների հետ չի զրուցել, միայն քրոջ անունն է տվել:

«Դժվարությամբ է քայլում, իրեն շատ թույլ է զգում: Բժիշկներն ասել են, որ ավելի վատ էր վիճակը, հիմա դեպի լավն է գնում: Չի խոսում, միայն քրոջ անունն է տվել: Հիշողության խնդիր ունի ինքը, բայց քրոջը ճանաչել է»,-պատմեց Լիլիթ Սարդարյանը: Ավելի վաղ հայտնել էինք, որ Սլավիկ Համբարձումյանը գտնվում է Նուբարաշենի հոգեկան առողջության կենտրոնում. նա հիշողության հետ կապված խնդիր ունի: Սլավիկի հարազատները մեզ հետ զրույցում նշել էին, որ չեն հավատում, թե նա ցանկանար Արցախից դուրս գալ, քանի որ Արցախի հայաթափման օրերին հրաժարվել էր լքել իր տունը և Հայաստան գալ: Հիշեցնենք, որ հունվարի 23-ին Աշխատանքի և սոցիալական հարցերի նախարար Արսեն Թորոսյանը ֆեյսբուքյան գրառմամբ հայտնեց այն մասին, որ Արցախում մնացած 11 քաղաքացիներ տեղափոխվել են Հայաստան։ Հայաստան տեղափոխված քաղաքացիները հարազատները նշել են, որ նախապես տեղեկացված չեն եղել սպասվող գործընթացի մասին. նախարարի գրառումից են տեղեկացել, որ իրենց հարազատները Հայաստանում են: