Որ ՊՈԱԿ-ն՝ ինչքան է ստացել. քաղաքացի, դու սոված, պարտքերի տակ ճռռա, կարևորը՝ Փաշինյանը, նրա թիմը լավ ապրեն

168.am-ը գրում է, որ Նիկոլ Փաշինյանի աշխատակազմն օրերս ավանդական դարձած ամենամյա 3 աստղաբաշխական դրամաշնորհներն է հատկացրել՝ սեփական կեցությունն ու գործունեությունն անխափան ու անխոչընդոտ ծավալելու նպատակով:

Այսպես. դեկտեմբեր 16-ին Պետական բյուջեից առաջին խոշոր հատկացումն է արվել «Սպասարկում» ՊՈԱԿ-ին: Այս ՊՈԱԿ-ը  487 միլիոն 897 հազար 500 դրամով (1286397.95 դոլար) պետք է իրականացնի վարչապետի աշխատակազմին ամրակցված շենքերի սպասարկումը, այդ թվում՝ շենքերում տեղակայված կառավարման մարմինների աշխատակազմերի շենքային պայմանների հետ կապված ընթացիկ սպասարկման աշխատանքները:

Ըստ պետգնումների էլեկտրոնային համակարգի՝ այս ՊՈԱԿ-ին դրամաշնորհներ սկսել են հատկացվել 2022 թվականից հետո միայն:

Հաջորդ դրամաշնորհը նույն օրը հատկացվել է «Կառավարական առանձնատների տնտեսություն» ՊՈԱԿ-ին՝ առավել հայտնի՝ կառավարական դաչաներ անվամբ: ՊՈԱԿ-ն այս տարի ստացել է 621 միլիոն 340 հազար 100 դրամ (1638371.18 դոլար), որպեսզի  ապահովի բարձրաստիճան պաշտոնատար անձանց գերատեսչական առանձնատների և տարածքների շահագործումն ու սպասարկումը, այդ թվում՝ առանձնատների կահավորման և տեխնիկական վերազինման կազմակերպումը:

Երրորդ ամենամեծ պետական աջակցություն՝ դրամաշնորհը հատկացվել է «Հանրային կապերի և տեղեկատվության կենտրոն» ՊՈԱԿ-ին, որը տարբեր շրջանակներ անվանում են ֆեյքերի պոակ: Այս ՊՈԱԿ-ն այս տարի ստացել  785 միլիոն 487 600 դրամ (2071069.93 դոլար)՝ «Հանրային իրազեկում և հասարակական ու քաղաքագիտական հետազոտություններ» միջոցառման շրջանակում:

Ու դարձյալ հիշեցնենք՝ վարչապետի աշխատակազմն իրեն ենթակա ՊՈԱԿ-ներին ուղղվող խոշոր դրամաշնորհների ավանդույթը հիմնադրել է 2022 թվականից։

168.am-ը նախորդ տարի դարձյալ հրապարակել էր դրամաշնորհների մասին տեղեկությունը: Նկատենք՝ նախորդ տարի   728 միլիոն 187.600 դրամ՝ շուրջ 1.8 մլն դոլար աստղաբաշխական չափի դրամաշնորհով էր վարչապետի աշխատակազմը «ֆեյքերի» ՊՈԱԿ-ին պատվիրակել  «Հանրային իրազեկում, հասարակական-քաղաքագիտական հետազոտությունների իրականացում» միջոցառման շրջանակներում մի շարք գործողությունների կատարումը:

Կառավարական դաչաներին էլ հատկացվել էր 621 միլիոն 340.100 դրամի, կամ ավելի քան 1,5 միլիոն դոլարի չափով աջակցություն։

Այս թվերն, իհարկե, ավելի ցցուն են երևում հատկապես կենսաթոշակառուների մասին Փաշինյանի վերջին աղմկոտ հայարարությունների ֆոնին, երբ նա պնդում էր, թե թոշակառուները չգիտեն՝ ինչպես արդյունավետ փող ծախսել։

«Թոշակառուների թոշակն ամսական 11 հազար դրամով կամ 10 հազար 400 դրամով ավելացնենք. ի՞նչ է անելու թոշակառուն։ Այդ գումարն ի՞նչ է անելու, ինչի՞ վրա է ծախսելու»,- ասել էր Փաշինյանը:

Պարզվում է՝ կա նաև Փաշինյանի տրամաբանության հակառակ կողմը՝ իրենք գիտեն ինչպես ծախսել: