Միջին կենսաթոշակ ստացողն աղքատ է, նվազագույն կենսաթոշակ ստացողը՝ ծայրահեղ աղքատ․ Թադևոս Ավետիսյան

ԱԺ «Հայաստան» խմբակցության պատգամավոր Թադևոս Ավետիսյանի ելույթը․

«Սիրելի հայրենակիցներ,

Այս կառավարության գործունեության հնգամյա շրջանն ավարտվում է։

Այլևս արձանագրված փաստ է․

սոցիալական պաշտպանության ոլորտի չափելի երեք խոստումները կատարված չեն, որի հետևանքով կենսաթոշակառուներն ու աշխատող աղքատները ներկայումս ապրում են ավելի վատ, քան ապրում էին 2021 թվականին։

Ընդհանուր պատճառը ևս ակնհայտ է․

այս անձանց եկամուտներն աճել են անհամեմատ ավելի քիչ չափով, քան արձանագրված գնաճն է, հատկապես՝ առաջին անհրաժեշտության ապրանքների գների բարձրացումը։

Հիմա բերեմ պաշտոնական ցուցանիշներ։

Կյանքի որակը գնահատելու հիմնական ցուցիչը նվազագույն զամբյուղի ամսական արժեքն է՝ մեկ մարդու գոյատևման համար անհրաժեշտ նվազագույն ծախսը։

Այս զամբյուղի արժեքը 2025 թվականի առաջին կիսամյակին 2021 թվականի առաջին կիսամյակի համեմատ աճել է 15000 դրամով։

Այս նույն ժամանակահատվածում՝

• նվազագույն կենսաթոշակն աճել է 9500 դրամով,
• միջին կենսաթոշակն աճել է 9000 դրամով,
• նվազագույն աշխատավարձը աճել է 7000 դրամով։

Այսինքն՝ կենսաթոշակառուն միջին կենսաթոշակով կարող է ամսվա ընթացքում կատարել ընդամենը իր 18 օրվա նվազագույն ծախսը, իսկ նվազագույն կենսաթոշակով՝ ընդամենը՝ 13 օրվանը։

Ավելի պարզ՝ միջին կենսաթոշակ ստացողը աղքատ է, իսկ նվազագույն կենսաթոշակ ստացողը ծայրահեղ աղքատ։

Խոստացել էին, որ միջին կենսաթոշակառուն պետք է հաղթահարի աղքատությունը, իսկ ծայրահեղ աղքատությունը պետք է վերացնեն։

Խոստացել էին նաև նվազագույն աշխատավարձը դարձնել 85000 դրամ։ Դրա չափը հիմա 75000 դրամ է՝ շուրջ 7000 դրամով պակաս նույնիսկ մեկ անձի նվազագույն ամսական ծախսից։ Ի դեպ, 2021 թվականին նվազագույն աշխատավարձը գերազանցում էր այդ շրջանում նվազագույն սպառողական զամբյուղի արժեքին։ Փաստորեն, նվազագույն աշխատավարձ ստացողն էլ դարձել է աշխատող աղքատ»։

Մանրամասն՝ տեսանյութում։