«Ես չեմ պատրաստվում համակերպվել, ոչ էլ լռել. ազատություն քաղբանտարկյալներին». Հայկ Մամիջանյան

ԱԺ «Պատիվ ունեմ» խմբակցության ղեկավար Հայկ Մամիջանյանն այսօր խորհրդարանում պատգամավորների հայտարարությունների ժամին անդրադարձավ Հայաստանում քաղբանտարկյալներին, մասնավորապես՝ Նարեկ Սամսոնյանին, ով արդեն 12-րդ օրն է՝ բանտում հացադուլ է հայտարարել։

«Սիրելի հայրենակիցներ, դուք պատրա՞ստ եք, որ Փաշինյանը որոշի, թե դուք այսօր ի՞նչ պիտի ուտեք կամ ո՞ւր գնաք։ Վստահ եմ, որ ոչ, բայց ինքն արդեն փորձում է մեզ թելադրել՝ ինչ խոսենք, ինչին հավատանք, ում հերոսացնենք։ Հաջորդը ո՞րն է, բոլորին ստիպելու է գլխարկ դնե՞ն։

Հայաստանում այս պահին կան 50-ից ավելի քաղբանտարկյալներ, մարդիկ ազատությունից զրկված են, որովհետև Փաշինյանին դուր չի գալիս, թե նրանք ինչ են խոսում, ինչպես են մտածում, ինչին են հավատում։ Բոլոր քաղբանտարկյալները պայքարում են մեզանից յուրաքանչյուրի իրավունքների համար»,- հայտարարեց Հայկ Մամիջանյանը։

Շարունակելով՝ Հայկ Մամիջանյանն ասաց, որ կապ չունի, թե որ քաղաքական ուժին է մարդը սատարում՝ քաղաքական բանտարկյալը պայքարում է յուրաքանչյուրի խոսքի ազատության համար։ Նրանք այդ պայքարից ավելի ուժեղ են դուրս գալու։

«Նրանցից մեկը՝ Նարեկ Սամսոնյանը, դիմել է պայքարի ամենածայրահեղ, ամենածանր միջոցներից մեկին՝ հացադուլի, և արդեն 12 օր է՝ հացադուլի մեջ է։

Նա պայքարում է ոչ միայն իր ազատության, այլև իր առողջության հաշվին՝ պայքարում է իմ և քո համար։ Նարեկի և մեր մյուս ընկերների պայքարին անտարբերությամբ պատասխանելն անշնորհակալ կլինի։

Գիտեք, ինձ գլխարկներ չեն սազում, ես չեմ պատրաստվում սկսել հարվածային գործիքների վրա նվագել սովորել, ոչ էլ պատրաստվում եմ լռել կամ հավատամքս փոխել, համակերպվել։ Պայքարի այլընտրանքը համակերպվելն է, վերանալը»,- ընդգծեց Հայկ Մամիջանյանը։

Մանրամասները՝ 168.am-ի տեսանյութում