Ուղղակի իմ անձից ձերբազատում եմ մարդկանց. Գագիկ Սարգսյանը հրաժարական տվեց դահուկային սպորտի ֆեդերացիայի նախագահի պաշտոնից

Գագիկ Սարգսյանը հայտարարել է, որ վայր է դնում Հայաստանի դահուկային սպորտի ֆեդերացիայի նախագահի լիազորությունները

Ըստ նրա՝ նման որոշում կայացնելու պատճառները մի քանիսն են, ու դրանցից մեկն այն աշխատանքային մթնոլորտն է, որը պետք է լինի ՀՀ-ում դահուկային մարզաձևը զարգացնելու առումով։

«Տարիներ շարունակ մեր խնդրանքները, դիմումները լիազոր մարմնին, այս դեպքում ՀՀ ԿԳՄՍ նախարարությանը, այդպես էլ լուծում չունեցան։ Ինչ-որ հարցերից ելնելով մտածում ես, որ գուցե քո անձն է խանգարում այդ մազաձևը զարգացնելուն, ու հիմա ուղղակի իմ անձից ձերբազատում եմ մարդկանց»,- նշել է Սարգսյանը։

Հիշեցնենք, որ Tour de ski մրցաշարի ժամանակ հայ դահուկավազորդ Միքայել Միքայելյանի կողմից համարով ժիլետի վրա «ադրբեջան» գրվածքը փակելու վերաբերյալ ԿԳՄՍՆ–ն հարցում էր ուղարկել  ֆեդերացիա, ինչին Սարգսյանը պատասխանել էր հետևյալ կերպ. «Մեր հայորդու քայլը առավել քան պարզ է, և կարծում ենք, որ չունի պարզաբանման կարիք»։
Հարկավ, եթե Սարգսյանն ինքը բացեիբաց չի ասում, ապա դժվար է միարժեքորեն պնդել, որ նրա հրաժարականը ուղիղ գծով կապված է վերը նշված միջադեպի հետ: Բայց մյուս կողմից, այս ամենը կողքից ընկալվում է հենց այդպես: Այսինքն, կարելի է ենթադրել, որ Ադրբեջանն արդեն Հայաստանում նույնիսկ մարզական ֆեդերացիաների ղեկավարների է փոխում կամ փոխել տալիս: Սա՛ է Նիկոլ Փաշինյանի ու նրա ՔՊ-ի խաղաղությունը, որն ավելի ճիշտ կլինի անվանել կզակեցություն: