Հայաստանում քաղաքական հայացքների արտահայտման համար մարդկանց ձերբակալելը լուրջ տարակուսանք և մտահոգություն է առաջացնում. Լավրով

Մոսկվայում հույս ունեն, որ Հայաստանի քաղաքական գործիչները, որոնք կողմ են Ռուսաստանի հետ համագործակցության զարգացմանն ու խորացմանը, չեն ենթարկվի հետապնդումների։ Այս մասին մամուլի ասուլիսի ժամանակ հայտարարել է Ռուսաստանի Դաշնության ԱԳ նախարար Սերգեյ Լավրովը՝ պատասխանելով Alpha News-ի հարցին:

«Ինչ վերաբերում է (Գյումրիի քաղաքապետ՝ խմբ.) Վարդան Ղուկասյանին, նրան մեղադրանք է առաջադրվել այն բանի համար, որ նա առաջարկել է քննարկել Հայաստանի միավորումը Ռուսաստանի և Բելառուսի հետ։ Քաղաքական հայացքների արտահայտման համար մարդկանց ձերբակալելը, որոնք որևէ կերպ ուղղված չեն Հայաստանի ինքնիշխանության և տարածքային ամբողջականության խաթարմանը, այլ նպատակ ունեն ընդլայնել նրա արտաքին կապերի հնարավորությունները՝ սեփական զարգացման շահերից ելնելով, բնականաբար, այս ամենը լուրջ տարակուսանք և մտահոգություն է առաջացնում»,- նշել է Լավրովը։

Նա ընդգծել է, որ Ռուսաստանում հույս ունեն՝ Հայաստանի այն քաղաքական գործիչները, որոնք կողմ են համագործակցության խորացմանը, չեն ենթարկվի հետապնդումների։ Նա պատասխանել է նաև Հայ Առաքելական եկեղեցու նկատմամբ ՀՀ իշխանությունների ճնշումների հետ կապված հարցին նշելով. «Մենք, իհարկե, ցավով ենք հետևում իրավիճակի զարգացմանը։ Ե՛վ ԱԺ նախագահ Ալեն Սիմոնյանը, և՛ վարչապետ Նիկոլ Փաշինյանը վերջերս տված հարցազրույցներում չեն բացառել, որ Ռուսաստանի Դաշնության կողմից հիբրիդային սպառնալիքներ կան Հայաստանի նկատմամբ։

Հիբրիդային սպառնալիքները կապված են ՀԱԵ-ի իրավիճակի հետ։ Բայց մեզ համար սա ոչինչ չի կարող առաջացնել բացի զարմանքից, և ԵՄ-ի հետ մոտեցումը առանց հետք չի անցնում։ Չեմ կարող չնշել սա, քանի որ հենց ԵՄ-ն է անընդհատ խոսում Ռուսաստանի կողմից ստեղծվող հիբրիդային սպառնալիքների մասին։