Փաշինյանը «խաղաղություն» է հաստատել մի պետության հետ, որը չի ճանաչում որևէ միջազգային իրավունք. Վարդան Պողոսյան

«Իրենք, որ սինխրոն են աշխատում, կարծում եմ՝ որևէ մարդու մոտ այլ տպավորություն չի կարող ստեղծվել։ Այո, Ալիևն ու Փաշինյանը սինխրոն են աշխատում»,-Panorama.am-ին ասաց միջազգային իրավունքի մասնագետ, սահմանադրագետ Վարդան Պողոսյանը։

Նա նշեց, որ Ալիևը ճիշտ է, երբ ասում է, որ միջազգային իրավունքը չի աշխատում, և հիմնավորեց, որ միջազգային իրավունքի նախապայմանը՝ 1945 թվականից հետո ստեղծված աշխարհակարգը(ՄԱԿ-ի կանոնադրությունը) փլուզվել է։

«Փաշինյանն ընդունում է, որ ինքը պարտվել է, Հայաստանը պարտվել է և, իբչ թե, ինքը «խաղաղություն» է հաստատել, բայց ում հետ՝ մի պետության, որը չի ճանաչում որևէ միջազգային իրավունք և որն առաջնորդվում է միայն ուժի թելադրանքով, հետևաբար էդ պարագայում Փաշինյանը հայ ժողովրդին ասում է, որ մենք պետք է հպատակվենք»,- ասաց Պողոսյանը։

Ըստ նրա, Փաշինյանը հայտարարում է, որ եթե Հայաստանում իշխանափոխություն լինի, ապա պատերազմ է լինելու և դրա պատճառով ինքը դարձել է թուրքահպատակ ու ադրբեջանահպատակ և նույնն առաջարկում է ժողովրդին։

Անդրադառնալով Հայ Առաքելական եկեղեցու դեմ Փաշինյանի արշավին՝ Սահմանադրագետն ասաց. « Էն ամենը, ինչը որ իր կողմից կատարվում է, ազգային արժեքների ոչնչացմանն է ուղղված, իսկ մեր արժեքների մեջ, հոգևոր կյանքում հայ եկեղեցին առանցային դեր է կատարել։ Պետականություն չունեցող ազգի համար այդպիսի մի առաքելություն, որն արել է Եկեղեցին, ես դժվարանում եմ այլ երկրների մոտ մտաբերել և հետևաբար՝ ցանկացած քայլ ազգային եկեղեցու նկատմամբ՝ ոտտնձգություն է մեր ինքնության դեմ»։

Պողոսյանի կարծիքով՝ Փաշինյանն իր առաջ հստակ նպատակ է դրել սահմանադրական փոփոխությամբ մեր բոլոր համազգային նպատակները և ազգային կառույցները դնել հարցականի տակ։

«Վստահ եմ, որ Հայ Առաքելական եկեղեցու մասին այնտեղ որևէ հիշատակում չի լինելու, սահմանադրության նախաբանում ամրագրված համազգային նպատակները վերացվելու են։ Սկզբից խուսափում էին այդ մասին խոսել, հիմա բաց տեքստով հայտարարում են, որ պետք է հրաժարվել Անկախության հռչակագրի հիշատակումից, իբր այն տանում է Հայաստանի կործանման։ Լրիվ հակատակը՝ եթե որևէ ազգ, ժողովուրդ հրաժարվում է իր ինքնությունից, նա իրեն դատապարտում է կործանման»։