Ռազմական ոստիկանությունում բունտ է հասունանում․ ծառայողներին բերման են ենթարկել Փաշինյանի երթին

Սուրբ Ծննդի օրը՝ հունվարի 6-ին, Նիկոլ Փաշինյանը քայլարշավ էր կազմակերպել Սուրբ Գրիգոր Լուսավորիչ եկեղեցուց դեպի Սուրբ Աննա եկեղեցի, որի անունը ինքը՝ Փաշինյանը, դրել էր «ուղտերթ», ՔՊ-ականները՝ «ուխտաերթ»։

Այդ միջոցառմանը չնայած որ բերման էին ենթարկվել պետական ապարատից, մարզերից, տարբեր համայնքներից աշխատողներ, բազմաթիվ ՔՊ-ական պաշտոնյաներ, ոտքի էր հանվել ողջ վարչական ապարատը, ուժային կառույցները, այնուամենայնիվ, մասնակիցների թիվը խիստ համեստ էր՝ մի փոքր ավելի՝ 2 հազարից։

Նիկոլ Փաշինյանի հավաքներին, սովորության համաձայն, ակտիվորեն բերվում են ուժայիններ, որոնց քաղաքացիական հագուստ են հագցնում և որպես հավատավոր նիկոլական մասնակից դարձնում շոուներին։ Yerevan.Today-ը տեղեկացավ, որ Պաշտպանության նախարարության զորամասերի և վարչությունների, այդ թվում և ռազմական ոստիկանության զինծառայողներին, հրահանգված է եղել մասնակցել «ուխտերթին» և մարդկանց անհրաժեշտ քանակ ապահովել՝ ցույց տալու համար, թե վերջինիս հակաեկեղեցական արշավը հայ ժողովրդի աջակցությունն է վայելում։

Yerevan.Today-ը պարզեց, որ «ուխտերթին» մասնակիցներ է ապահովել պաշտպանության նախարարությունը՝ Ռազմական ոստիկանության օղակից։

Ավելին, ասացին, որ Ռազմական ոստիկանությունում բունտ է հասունանում, քանի որ արդեն որերորդ դեպքն է՝ որ իրենց օգտագործում են քաղաքական գործընթացների մեջ, և նրանք ստիպված մասնակցում են «տուն պահելու» համար։

Եվ այսպես, ներկայացնում ենք Նիկոլ Փաշինյանի «ուղտերթի» մասնակից ՌՈ բազմաթիվ աշխատակիցներից մի քանիսի լուսանկարները։