Իրանում շարունակվում են ցույցերն ու անկարգությունները (տեսանյութ)

Իրանում անցած գիշեր տեղի են ունեցել վերջին երկու օրվա ընթացքում ամենամեծ բողոքի ցույցերը։ Այս մասին իր Telegram–ում գրել է իրանագետ Ժաննա Վարդանյանը։

Արևելագետի խոսքով՝ երկրում անջատված է ինտերնետը, դեպքի վայրից հավաստի տեղեկատվություն ստանալը շատ դժվար է։ Չի գործում նաև բջջային կապը։

Իրանական թեմաներով հրապարակումներում այլ աղբյուրները գրում են, որ ցուցարարները սկսել են հարձակվել Իսլամական հեղափոխության պահապանների կորպուսի (ԻՀՊԿ) մարտիկների և իրավապահ մարմինների աշխատակիցների վրա։ Նման բախումներ են, մասնավորապես, տեղի ունեցել Ղազվին քաղաքում։

Տեղեկությունների համաձայն՝ խափանվել է նաև օդային կապը։ Թեհրանում բողոքի ցույցերի ժամանակ քաղաքի կենտրոնում հրդեհներ են բռնկվել. ցուցարարներն այրել են մեքենաներ, մոտոցիկլետներ և բարիկադներ։

Հիշեցնենք` Իրանում բողոքի ցույցերը սկսվել են 2025 թվականի դեկտեմբերի վերջին՝ տեղական արժույթի՝ իրանական ռիալի արժեզրկման պատճառով։ Ցույցերի հիմնական թեման սկզբում փոխարժեքի կտրուկ տատանումներն էին և դրանց ազդեցությունը մեծածախ և մանրածախ գների վրա։ Սակայն ավելի ուշ Իրանի մի շարք քաղաքներում բողոքի ցույցերը վերաճեցին ոստիկանության հետ բախումների, կարգախոսներն էլ քաղաքական աստառ ստացան ընդդեմ Իրանի ներկայիս քաղաքական համակարգի։

Աղբյուրը՝ arm.sputniknews.ru