Աբբաս Արաղչի. Իրանի զինված ուժերը բարձր մարտական պատրաստության մեջ են
Իրանի արտաքին գործերի նախարար Աբբաս Արաղչին հայտարարել է, որ երկրի զինված ուժերը բարձր մարտական պատրաստության մեջ են և ճշգրիտ գիտեն, թե որտեղ պետք է թիրախավորեն Իրանի ինքնիշխանության ցանկացած խախտման դեպքում, հաղորդում է Mehr-ը։
Այսպես է արձագանքել Իրանի արտաքին գործերի նախարարը ԱՄՆ նախագահ Դոնալդ Թրամփի վերջին հայտարարություններին։
«Իրանում ժամանակավոր փոխարժեքի անկայունությունից տուժածները վերջերս խաղաղ բողոքի ցույցեր են անցկացրել, ինչը նրանց իրավունքն է։ Ավելին, մենք ականատես ենք եղել բռնի անկարգությունների առանձին դեպքերի, այդ թվում՝ ոստիկանական բաժանմունքի վրա հարձակումների և սպաների վրա Մոլոտովի կոկտեյլներ նետելու։ Հաշվի առնելով նախագահ Թրամփի կողմից Ազգային գվարդիայի տեղակայումը ԱՄՆ սահմաններում, նա, ավելի քան որևէ մեկը, պետք է իմանա, որ պետական սեփականության վրա հանցավոր հարձակումները չեն հանդուրժվի»։
«Ահա թե ինչու նախագահ Թրամփի այսօրվա ուղերձը, որը, հավանաբար, ազդվել է նրանց կողմից, ովքեր վախենում են դիվանագիտությունից կամ սխալմամբ կարծում են, որ այն անհրաժեշտ չէ, անխոհեմ և վտանգավոր է», - ընդգծել է Իրանի արտաքին գործերի նախարարը։
Աբբաս Արաղչին նշել է, որ, ինչպես անցյալում, Իրանի ժողովուրդը վճռականորեն կմերժի իր ներքին գործերին ցանկացած միջամտություն։
«Նմանապես, մեր հզոր զինված ուժերը գտնվում են բարձր պատրաստվածության վիճակում և ճշգրիտ գիտեն, թե որտեղ հարվածել Իրանի ինքնիշխանության ցանկացած խախտման դեպքում», - ընդգծեց Արաղչին։
Ավելի վաղ ԱՄՆ նախագահը սոցիալական ցանցերում գրել էր, որ «եթե Իրանը կրակի և դաժանորեն սպանի խաղաղ ցուցարարներին, ինչպես իրենց սովորությունն է, Ամերիկայի Միացյալ Նահանգները կգա նրանց օգնության»։
Աղբյուր՝ News.am
Հետևեք մեզ Facebook-ում