Փաշինյանն ու ՔՊ-ն Արաքս գետի ջրերի օգտագործման իրավունքը նվիրել են իրենց սիրելի գործընկեր Թուրքիայի՞ն

Թուրքական evrensel.net պարբերականը հայտնում է, իսկ haqin.Az-ը երկրորդում է, որ Հայաստանի վարչապետ Նիկոլ Փաշինյանը Թուրքիային է զիջել Արաքս գետի ջրային ռեսուրսների կառավարման բացառիկ իրավունքները՝ առաջիկա 99 տարվա համար։ Համաձայն հաղորդման, Թուրքիայի եւ Հայաստանի միջեւ հարաբերությունների կարգավորման համաձայնագրով նախատեսվում է, որ Թուրքիային թույլատրվելու է կառուցել մի շարք ջրային էլեկտրակայաններ ու ամբարտակներ գետի վրա։

Հրապարակման մեջ ասվում է, որ համաձայնագիրը, որը Երեւանը համարում է անհրաժեշտ քայլ՝ կարգավորելու իրավիճակը ռեգիոնում, միջազգային դիտորդները գնահատել են որպես Թուրքիայի նախագահ Թայիփ Էրդողանի ռազմավարական մեծ հաղթանակ։ Հրապարակման մեջ հիշատակված է, որ Հայաստանն այլ սիմվոլիկ քայլեր էլ է ձեռնարկել` զիջումների գնալով, ինչպես, օրինակ, Արարատ սարի պատկերի հեռացումը անցակետային կնիքներից։ Այս ամենը ցույց է տալիս, որ Հայաստանը գտնվում է խոցելի վիճակում՝ պատերազմում կրած պարտությունից հետո, եւ Անկարայի ազդեցությունը գնալով ընդլայնվում է՝ եզրակացնում է հոդվածի հեղինակը։
Աղբյուր՝ «Հրապարակ»