Գառնիում նիկոլականները պատրաստվում են կիրակնօրյա կուսակցական «պատարագին». համայնքապետարանում ուժայինների մասնակցությամբ քննարկում է եղել

Նիկոլ Փաշինյանի այցին ընդառաջ Գառնիի համայնքապետարանում այսօր՝ դեկտեմբերի 26-ին, հանդիպում-քննարկում է եղել, որին մասնակցել են Կոտայքի մարզպետը, համայնքապետը, մարզի ուժային կառույցների ներկայացուցիչներ: NEWS.am-ի տեղեկություններով «աշխատանքային խումբ» է ձևավորվել, որպեսզի կիրակի Գառնիի Սուրբ Աստվածածին եկեղեցի ժամանող Փաշինյանին հավուր պատշաճի դիմավորեն: Կոտայքի մարզպետ Ահարոն Սահակյանը համայնքապետարանից դուրս գալով NEWS.am-ի հետ զրույցում նշեց, որ ինքը աշխատանքային այցով է գտնվում Գառնիում, և որ իրավապահ համակարգի ներկայացուցիչներ ներկա չեն եղել հանդիպմանը, սակայն մեր տեսախցիկը ֆիքսել է ուժայինների տրանսպորտային միջոցները հենց համայնքապետարանի շենքի մոտ կայանած։ Ավելին գյուղի տարածքում, մասնավորապես Սուրբ Աստվածածին եկեղեցու մոտ, որտեղ Փաշինյանն այս կիրակի պատարագի է մասնակցելու, ոստիկանական մեքենա էր պտտվում: Ուժայինների հետ հանդիպման լուրը հաստատել էր նաև համայնքապետարանի News.am-ի աղբյուրը:

«Այո, միանշանակ, կիրակի այստեղ մասնակցելու եմ պատարգի, տեղյակ չեմ՝ ով է մատուցելու պատարագը»,–ասաց նա։
--
Մեր կողմից նկատենք, որ ըստ տեղեկատվության՝ Փաշինյանը իր կուսակցական պսևդո-«պատարագը», այսինքն՝ ՀԱԵ տարբեր եկեղեցիներում անցկացվող ագրեսիվ կողմնակիցների հավաքը այս անգամ հրավիրել է Գառնիում: Այսինքն, դրանից բխում է, որ դեկտեմբերի 28-ին Մայր Տաճարի վրա զինված քպ-ական ուժայինների միջոցով գրոհ կարող է և չլինել: Եթե միայն Գառնու տարբերակը շեղող մանևր չի: Ամեն դեպքում, փաշինյանական իշխանությունից սպասելի է ցանկացած քայլ, ուստի ազգային Եկեղեցու պաշտպան հայ քրիստոնյաները արժե, որ պատրաստ լինեն: