Մենք լուրջ դաշնակիցներ կարող ենք ունենալ, ի դեմս Ռուսաստանի, նաև ԱՄՆ այսօրվա վարչակազմի. Բոզոյան

Բոլոր քաղաքական ուժերը պետք է իրենք այլընտրանքային առաջարկներով հանդես գան, որոնք պետք է ինչ-որ տրամաբանության շրջանակներում լինեն։ Այս մասին, այսօր՝ դեկտեմբերի 24–ին, «Հայաստանը ազգային ազդեցությունների թատերաբեմ» խորագրով քննարկման ժամանակ նշեց քաղաքագետ Երվանդ Բոզոյանը։

«Այսօրվա իշխանությունը փորձելու է այն թեզով հանդես գալ, որ եթե ինքը չվերարտադրվի, ապա կլինի Հայաստանում նոր պատերազմ։ Մենք պետք է հանդես գանք հետևյալ ձևով, որ կա երկու ճանապարհ՝ խաղաղությունով գնալ դեպի գերեզման և խաղաղությունով գնալ դեպի բարգավաճում։ 2026 թվականին հայ ժողովուրդը պետք է ընտրի այս երկուսի միջեւ։

Մենք կարող ենք իսկապես նոր էջ բացել և նախկին սխալները թույլ չտալով, իսկապես նոր որակի Հայաստան կառուցել:

Փաշինյանը, հաշվի առնելով այն հանգամանքը, որ հայտնվել է ծուղակում, ինքը ունի անասնական վախ, որ եթե հանկարծ չվերընտրվի, կարող է պատասխանության ենթարկվել, դրանից ինքը վախեցած է և ամեն գնով ուզում է բոլորից աղերսել այդ աջակցությունը և փաստացի կորցրել է իրեն։ Նա այնպիսի քայլեր է անում և այնպիսի աջակցություն է խնդրում Ադրբեջանից և Թուրքիայից, որ նույնիսկ իր կողմնակիցներն են ապշած և զարմացած։

Մեր շփումները ցույց են տալիս, որ ժողովուրդն ուզում է հստակ, առարկայական այլընտրանքներ։ Օրինակ, մենք՝ «Մայր Հայաստանը» ունի իր ծրագրերը, «Առաջարկ Հայաստան» նախաձեռնություն կա և ես կարծում եմ, որ այդ ուղեղային գրոհի արդյունքում մենք կարող ենք ստանալ լուրջ մակարդակի առաջարկներ, որովհետև Հայաստանի զարգացման համար ոչ մի օբյեկտիվ խոչընդոտ չկա։

Մենք իսկապես լուրջ դաշնակիցներ կարող ենք ունենալ, ի դեմս այսօրվա Ռուսաստանի, ի դեմս այսօրվա Միացյալ Նահանգների նախագահի վարչակազմի, որի գաղափարական արժեքային համակարգը շատ հոգեհարազատ է մեր արժեքային համակարգին»,– հայտարարեց Բոզոյանը։
Աղբյուր՝ News.am