Ուիտկոֆ.Ուկրաինայի պատվիրակությունը Ֆլորիդայում արդյունավետ հանդիպումներ է ունեցել ԱՄՆ և Եվրոպայի ներկայացուցիչների հետ

Վերջին երեք օրերի ընթացքում Ֆլորիդայում ուկրաինական պատվիրակությունը մի շարք արդյունավետ և կառուցողական հանդիպումներ է ունեցել ամերիկացի և եվրոպացի գործընկերների հետ, գրել է ԱՄՆ հատուկ ներկայացուցիչ Սթիվ Ուիտկոֆը X սոցիալական մեդիա հարթակում։

Ըստ նրա՝ ուկրաինական պատվիրակության կազմում էին Ուկրաինայի ազգային անվտանգության և պաշտպանության խորհրդի քարտուղար Ռուստեմ Ումերովը և Ուկրաինայի զինված ուժերի գլխավոր շտաբի պետ, գեներալ-լեյտենանտ Անդրեյ Հնատովը։ ԱՄՆ պատվիրակության կազմում էին հատուկ դեսպանորդ Սթիվ Ուիտկոֆը, Ջարեդ Քուշները և Սպիտակ տան պաշտոնյա Ջոշ Գրյունբաումը։

«Եվրոպացի ազգային անվտանգության հիմնական խորհրդականները նույնպես միացել են քննարկումներին՝ Ուկրաինայի, ԱՄՆ-ի և Եվրոպայի համատեղ ռազմավարական մոտեցումը համաձայնեցնելու համար»։ Ուկրաինայի և ԱՄՆ-ի միջև առանձին կառուցողական հանդիպում է տեղի ունեցել, որի ընթացքում քննարկվել են չորս հիմնական փաստաթղթեր՝ 20 կետանոց պլանի հետագա մշակումը, անվտանգության երաշխիքների բազմակողմ շրջանակի վերաբերյալ դիրքորոշումների համակարգումը, Ուկրաինայի համար ԱՄՆ անվտանգության երաշխիքների շրջանակի վերաբերյալ դիրքորոշումների համակարգումը և «Տնտեսություն և բարգավաճում» ծրագրի հետագա զարգացումը։ Հատուկ ուշադրություն դարձվեց հաջորդ քայլերի ժամանակացույցի և հաջորդականության քննարկմանը: Ուկրաինան շարունակում է լիովին հանձնառու լինել արդար և կայուն խաղաղության հասնելուն։

Մեր ընդհանուր առաջնահերթությունն է դադարեցնել սպանությունները, ապահովել երաշխավորված անվտանգությունը և ստեղծել պայմաններ Ուկրաինայի վերականգնման, կայունության և երկարաժամկետ բարգավաճման համար: Խաղաղությունը պետք է լինի ոչ միայն ռազմական գործողությունների դադարեցում, այլև կայուն ապագայի արժանի հիմք: Ուկրաինան բարձր է գնահատում Միացյալ Նահանգների առաջնորդությունն ու աջակցությունը, ինչպես նաև գործընկերների հետ նրա շարունակական սերտ համակարգումը այս կարևոր աշխատանքի հաջորդ փուլերում», - նշել է Ուիտկոֆը։

Ավելի վաղ Ռուսաստանի նախագահի հատուկ ներկայացուցիչ Կիրիլ Դմիտրիևը մեկնել էր Ֆլորիդա՝ ամերիկյան կողմի հետ առանձին բանակցություններ վարելու համար։
Աղբյուր՝ News.am