Փաշինյանը Ալիևին «երախտագիտություն հայտնելու» ավելի լավ տեղ չի գտել, քան՝ ԵԱՏՄ բարձրագույն խորհրդի ընդլայնված կազմով նիստը

ՔՊ ղեկավար Նիկոլ Փաշինյանը Սանկտ Պետերբուրգում ընթացող Եվրասիական տնտեսական բարձրագույն խորհրդի ընդլայնված կազմով նիստի ժամանակ շնորհակալություն է հայտնել իր գործընկեր Ադրբեջանի նախագահ Իլհամ Ալիևին։

Մասնավորապես, նա երախտագիտություն է հայտնել Ալիևին՝ Ադրբեջանի տարածքով դեպի Հայաստան բեռների տարանցումն ապաշրջափակելու որոշման համար։

«Պետությունների հարգարժան ղեկավարներ, հարգելի՛ ներկաներ,

Ուրախ եմ ողջունել ձեզ Եվրասիական տնտեսական բարձրագույն խորհրդի եզրափակիչ նիստում։ Օգտվելով առիթից՝ ցանկանում եմ անկեղծ շնորհակալությունս հայտնել Ռուսաստանի Դաշնության նախագահ Վլադիմիր Վլադիմիրի Պուտինին՝ ցուցաբերած հյուրընկալության և այսօրվա նիստի կազմակերպման բարձր մակարդակի համար։ Թույլ տվեք նաև Ղազախստանի Հանրապետությանը հաջող և արդյունավետ աշխատանք մաղթել առաջիկա նախագահության շրջանակում։

Հարգելի՛  մասնակիցներ,

Այս տարի մենք ամփոփում ենք եվրասիական տնտեսական ինտեգրման 2025 թվականի զարգացման ռազմավարական ուղղությունների իրականացման արդյունքները, որոնց շրջանակում փոխգործակցության զգալի գործնական փորձ է կուտակվել։ Այս համատեքստում մենք այսօր ձևավորում ենք եվրասիական տնտեսական ինտեգրման հետագա զարգացման ուղենիշները՝ հիմնվելով ձեռք բերված արդյունքների վրա։ Եվ այս փուլում սկզբունքորեն կարևոր է ապահովել վերազգային մեխանիզմների կիրառման ոլորտների և այն ոլորտների հստակ տարանջատումը, որտեղ պահպանվում են ազգային իրավասությունների ու ինքնիշխան որոշումների առաջնահերթությունները, ինչը կապահովի ինտեգրացիոն գործընթացների կայունությունը։

Ընթացիկ տարին հատկապես նշանակալի էր ԵԱՏՄ միջազգային համագործակցության համար։ Ընդլայնվում է փոխգործակցությունն առանցքային գործընկերների՝ Իրանի, Միավորված Արաբական Էմիրությունների, Մոնղոլիայի, Չինաստանի և Հնդկաստանի հետ։ Բացվում են նոր շուկաներ, ինչը նպաստում է արտահանման ու ներմուծման դիվերսիֆիկացմանը, ինչպես նաև ամրապնդում է ԵԱՏՄ դիրքերը համաշխարհային տնտեսության մեջ։ Այս համատեքստում, իհարկե, ողջունում ենք Ինդոնեզիայի Հանրապետության հետ ազատ առևտրի մասին համաձայնագրերի ստորագրումը։ Հայաստանի Հանրապետությունը հատուկ նշանակություն է տալիս նաև այն դիտորդ պետությունների հետ կառուցողական երկխոսության զարգացմանը, որոնք կայուն հետաքրքրություն են ցուցաբերում ԵԱՏՄ-ի հետ փոխգործակցության նկատմամբ։

Ներքին շուկայի անխափան գործունեության ապահովումն ինտեգրման առաջնահերթ խնդիրներից է։ Սա նշանակում է խոչընդոտների հետևողական վերացում, թվայնացում և կարգավորող ընթացակարգերի պարզեցում, ինչպես նաև հավասար պայմանների ստեղծում տնտեսական գործընթացի բոլոր մասնակիցների համար։ Համոզված եմ, որ հանձնաժողովը՝ անդամ պետությունների կառավարությունների հետ համատեղ, պետք է շարունակի լուծել զգայուն հարցերը փոխընդունելի պայմանավորվածությունների մշակման միջոցով։ Թույլ տվեք նշել առևտրալոգիստիկ համագործակցության զարգացման հեռանկարները՝ հիմնված փոխադարձության, իրավահավասարության, ինչպես նաև ինքնիշխանության և ազգային իրավազորության սկզբունքների վրա։

Այս համատեքստում ցանկանում եմ նշել, որ տեղի ունեցող բարենպաստ և կառուցողական փոփոխությունները նոր հնարավորություններ են ստեղծում մեծ տարածաշրջանի բոլոր երկրների համար՝ նպաստելով տնտեսական կայունության ամրապնդմանը և տարածաշրջանային հաղորդակցությունների ընդլայնմանը։

Այս կապակցությամբ երախտագիտությունս եմ հայտնում Ադրբեջանի Հանրապետության նախագահին՝ Ադրբեջանի տարածքով դեպի Հայաստան բեռների տարանցումն ապաշրջափակելու որոշման, ինչպես նաև երկկողմ առևտուր սկսելու համար պայմաններ ստեղծելու համար։ Սա տարածաշրջանում խաղաղության և կայունության հաստատման շրջանակում առաջին կարևորագույն ձեռքբերումներից մեկն է»,- ասել է Նիկոլ Փաշինյանը։