Հասկանալի է, թե ինչու են ադրբեջանցիները նյարդայնացած արցախցի փախստականներին ցուցաբերվող ռուսական օգնությունից

Ինչպես հայտնի է, Ռուսաստանը  շարունակում է  մարդասիրական օգնություն տրամադրել Լեռնային Ղարաբաղից «ներքին տեղահանված անձանց»։

«Ռուսաստանը ձեզ հետ է» նախագիծը, որն իրականացնում է «Ռոսսոտրուդնիչեստվո»-ն, ռուսական այլ հումանիտար բնույթի կազմակերպությունների հետ միասին, որոշել է  երկարաձգել  օգնություն տրամադրելը,  առնվազն մինչև 2026 թվականը ներառյալ, հայտարարել է «Ռոսսոտրուդնիչեստվո»-ի ղեկավարի տեղակալ Իգոր Չայկան։

«Լեռնային Ղարաբաղից ներքին տեղահանված անձանց աջակցությունը միանվագ նախաձեռնություն չէ, այլ հետևողական ջանք»,- նշել է Չայկան։

Նշենք, որ 2025 թվականին աջակցություն է տրամադրվել ավելի քան 5000 ընտանիքի։ Ծրագրի շրջանակներում ձեռք է բերվել ավելի քան 7300 մարդասիրական փաթեթ և ևս 1000՝ երեխաների համար։ Օգնությունը ուղղված է ամենախոցելի խմբերին՝ մեծ ընտանիքներին, տարեց անդամներ ունեցող և կերակրողին կորցրած ընտանիքներին։

Հատկանշական է, որ այս կազմակերպության  գործնեության ակտիվացումը  համընկավ  «Ռոսսոտրուդնիչեստվո»-ի ղեկավարի տեղակալի պաշտոնում այս տարվա գարնանը Չայկայի նշանակման հետ:

Հատկանշական է նաև, այն, որ Չայկան նշելով այս օգնության մասին, այն  գնահատել է որպես նախկինում Արցախի շուրջ կոնֆլիկտի վերաբերյալ Մոսկվայի կողմից օգնության շարունակություն:

Եթե նախկինում այդ օգնությունը ռազմաքաղաքական բնույթի էր, ապա այսօր այն դարձել է հումանիտար բնույթի:

Ի դեպ, Ադրբեջանում նյարդայնանում են նման ձևակերպումներից, համարելով, այն որպես Մոսկվայի կողմից Արցախի խնդրի ռեանիմացիայի փորձ՝ հումանիտար հարթակով:

Մասնավորապես, ադրբեջանցիներին դուր չի գալիս այն ձևակերպումը, թե արցախիները տեղահանվել են իրենց պատմական Հայրենիքից:

Ադրբեջանում, դա գնահատվում է, որպես «հայերի կամավոր բնույթի հեռացում Ադրբեջանի տարածքից»:

Հասկանալի է, որ Ադրբեջանը փորձում է ամեն գնով փակել այս հարցը, նույնիսկ դիվանագիտական հարթակներում թույլ չտալով, որ քննարկվի արցախցիների վերադարձի իրավունքը:

Ալիևը դեռ երկու տարի առաջ էր առաջարկում Փաշինյանին փակել ոչ միայն Արցախի քաղաքական պատմությունը, այլև արցախցիների վերադարձի իրավունքի խնդիրը: Խոստանալով, որ դրա դիմաց նա կփակի, այսպես կոչված, արևմտյան ադրբեջանցիների վերադարձի հարցը Հայաստան:

Փաստացի, այն ժամանակ, Ալիևը փորձում էր արցախցիների վերադարձի իրավունքը, որն առկա է բոլոր դիվանագիտական հարթակներում, նույն նժարի վրա դնել Հայաստան, այսպես կոչված, արևմտյան ադրբեջանցիների վերադարձի հարցի հետ, ինչը ոչ մի միջազգային հարթակում լեգիտիմ չի համարվում:

Հետաքրքիր է, որ երկու տարի անց, 2025-ին, Փաշինյանն ամեն ինչ անում է, որ լռեցնի նույնիսկ արցախցիների վերադարձի խնդիրը, իսկ Ալիևը, դրժելով իր նախկին խոստումը, այսօր արդեն հայտարարում է, որ առանց ադրբեջանցիների վերադարձի Հայաստան, խաղաղություն տարածաշրջանում չի լինի:

Այս ամենը ցույց է տալիս, թե ինչ վտանգների առաջ է կանգնած Հայաստանը, և ով կարող է դժվարին պահին աջակցել մեզ, որպեսզի հնարավոր լինի զսպել Ալիևի՝ օրից օր աճող ախորժակը:

Սա է իրականությունը:

Արտակ Հակոբյան
Zham.am