«200 հազար դոլարանոց տունն ի՞նչ է, որ ես 20 կամ 10 տարի հետո չպետք է ունենամ». Գալյանը՝ լրագրողներին

Լրագրողներն այսօր Արդարադատության նախարար Սրբուհի Գալյանից հետաքրքրվեցին, թե ինչպե՞ս է ստացվում, որ մոտ 1մլն դրամ աշխատավարձ ստացող ԱԳ և Պաշտպանության նախարարները ձեռք են բերում մի քանի տասնյակ միլիոնավոր դրամների արժողության գույք, թեկուզ՝ վարկով։

«Ես էլ եմ վարկով բնակարան ձեռք բերել։ 50 մլն դրամից մի քիչ քիչ արժողության։ Մարում եմ վարկը, որովհետև ժամանակին լավ եմ սովորել և ունեմ աշխատանք, որը վարձատրվում է բավականին լավ, ինչը ինձ հնարավորություն է տալիս վերցնել և մարել  վարկը և ունենալ նաև գույքային ձեռքբերումներ։

Հիփոթեքը նրա մասին է, որ այսօր յուրաքանչյուր քաղաքացի, ով ունի կայուն եկամուտ, կարող է ձեռք բերել բնակարան և մարել պարտքը 20-30 տարվա ընթացքում։ Կարծում եք՝ նախարարները կամ իմ նման կրթություն ստացած անձիք, եթե նույնիսկ չլինեն նախարար, չեն ունենա՞ այնպիսի  արժանապատիվ աշխատավարձ, որ 20 կամ  15 տարվա ընթացքում մարեն վարկը»,-ասաց Գալյանը։

Նրան անհասկանալի են այն հարցադրումները, թե եկել են պաշտոնի, որպեսզի տուն առնեն. «Կներեք, մարդն աշխատում է, ընդ որում, կատարում է շատ ծանր աշխատանք։ Ես իմ մասին եմ խոսում։ Այո, 200 հազար դոլարանոց տունն ի՞նչ է, որ ես 20 կամ 10 տարի հետո չպետք է ունենամ։ Պետք է ունենամ այնքան, որքան կարող եմ ունենալ»,- ասել է նա։