ՀՀ ինքնիշխանությունը տապալող թիվ մեկ ուժը գործող կառավարությունն է. Ստեփան Դանիելյան

Եվրամիության կողմից 15 մլն եվրո տրամադրումը Հայաստանին, միանշանակ, միջամտություն է Հայաստանի ներքաղաքական կյանքին և ընտրություններին, բայց այստեղ առանձնապես որևէ զարմանալու բան չկա, որովհետև աշխարհաքաղաքական մրցակցություն է Հարավային Կովկասում, Aysor.am-ի հետ զրույցում ասաց քաղաքագետ Ստեփան Դանիելյանը։

«Անցած և նախանցած տարիներին ՆԱՏՕ-ի գլխավոր քարտուղարը, ԵՄ այս տարածաշրջանում հանձնակատարը հայտարարեցին, որ իրենց համար թիվ մեկ խնդիրն այն է, որ Ռուսաստանը լքի տարածաշրջանը։ Վրաստանում էլ հայտնի դեպքերն էին տեղի ունենում, որտեղ իշխանությունը մեղադրում էր եվրոպական կառույցներին, որ ցանկանում են հեղափոխություն իրականացնել։ Նպատակն այն է, որպեսզի դուրս գան Կենտրոնական Ասիա, այսինքն՝ աշխարհաքաղաքական պայքար է գնում, որի ընթացքում խոսել մարդու իրավունքների, ինքնիշխանության մասին, արդեն անլուրջ է»,-ասաց քաղաքագետը։

Նրա խոսքով՝ հարցն այն է, որ Հայաստանում ունենք մի իշխանություն, որը փորձում է վերարտադրվել և այդ վերարտադրվելու տրամաբանությունը նույնպես նման կերպով է կառուցում։

«Գործող վարչապետն ու իր թիմակիցները հայտարարում են, որ իրենք պայքարում են կայսրության դեմ, չեն ուզում ծայրագավառ լինել, հայտարարում են, թե ինչ-որ եպիսկոպոսներ ԿԳԲ-ի լրտեսներ են, որ Կաթողիկոսը նույնպես աշխարհաքաղաքական ինչ-որ կենտրոնի է սպասարկում։ Բնականաբար, խոսքը Ռուսաստանի մասին է։ Հետևաբար, Հայաստանի գործող իշխանությունն ինքն է այդ տրամաբանության մեջ և փորձում է աջակցություն ստանալ վերարտադրվելու համար։ Այսինքն, մեր աշխարհաքաղաքական պայքարը Հայաստանի ներքաղաքական կյանքում առաջին հերթին գործող իշխանության քաղաքականությունն է։ Տվյալ դեպքում ԵՄ բարձր ներկայացուցիչ Կայա Կալլասը և մյուսներն ուղղակի սպասարկում են գործող կառավարությանը»։

Դիտարկմանը, թե կարելի է ենթադրել, որ ԵՄ-ն փորձելու է այնպես անել, որ Հայաստանում իշխանափոխություն չլինի, Ստեփան Դանելյանն արձագանքեց.

«Որոշումը կայացնում է Հայաստանի ժողովուրդը և առաջին հերթին պետք է հանրության հետ աշխատել ու բացատրել, որ ամենակարևորը մեր ինքնիշխանությունն է, թույլ չտալ, որ արտաքին ուժերը խոչընդոտեն մեր ինքնիշխան որոշում կայացնելու գործում։ Տվյալ դեպքում մեր ինքիշխանության դեմ պայքարող համար մեկ ուժը կամ ինքնիշխանությունը տապալողը Հայաստանի գործող կառավարությունն է»։